Federasyonê Elewêyan o Demokratîk (FEDA) û Yewîya Cinîyan ê Elewîyan a Demokratîke (DAKB) eşkerayîya hempare daye. Vengdayîşê “Ameyoxêko bê kiştiş û qirkerdişî” de va ke bê rîbirîameyîşê qirkerdişan ke Meraş ra resena Roboskî, aştîya komelkîye nêyena.
FEDA û DAKB’yî wesîleyê serrgêrra qirkerdişanê Meraş, Roboskî û zîndanan a 19ê kanûne de eşkerayîya nuştekîye daye.
Eşkerayîye de bale ame antene ser ke kanûne dewrêk o ke tarîxê Tirkîya û Kurdîstanî yê nêzdî de qirkerdişê tewr gonîyinî ciwîyayî ke elewî, şorişger û kurdî hedef girewtî. Ame îfadekerdene ke hêrîşo ke 19-26ê kanûne 1978î de Meraş de elewîyê kurd-tirkî hedef girewtî “hêrîşêkê wedarkerdişê nîjad û dînî yo plankerde bî ke organîze û binê çimanê dewlete de bî.”
“Meraş de qirkerdişê binê çimanê dewlete de ame kerdene”
Eşkerayîye de ame vîrardene ke Meraş de taxî ameyî girewtene, rayîrî ameyî girewtene û şaristan bi rojan binê îşxalî de mend. Hêrîşê ke bi sloganê “Elewîyan pak bikerê”, “Ewro roja cîhadî ya” ameyî ramitene, hem pakkerdişê etnîk-dînî bî hem zî muxalefetê komelkîye hedef girewt.
Şîdeto ke zîndanan ra reseno Roboskî
FEDA û DAKB’yî ardvîrardene ke 19ê kanûne 2000î de bi nameyê Operasyonê Agêrayîşê Cuye eynî wext de 20 zîndanan de hêrîş ame kerdene û 30 ra zêdeyêr tepîşteyê sîyasî ameyî kiştene û bi seyan birîndar bîyî. Eşkerayîye de ame vatene ke no rîpelê tarîxê zîndananê Tirkîya de tewr tarîyan ra yew o.
Eşkerayîye de heto bîn ra ame vîrardene ke 28ê kanûne 2011î de bombardumanê teyareyanê TSK’yî de dewa Roboskî ya Şirnexî de 34 dewijê kurdan ameyî kiştene.
Ame vatene ke nê nimûneyê ke Meraşî ra resenê Roboskî, zîndanan ra resenê dewan, delîlê polîtîkayanê wedardayîşê organîze yê ke şarê kurdan hedef gênê. Ame îfadekerdene ke no dewro ke qiseyê aştîye û komelê demokratîkî rojeve de yê, seba rîbirîameyîşî fîrsendêko muhîm o.
FEDA û DAKB’yî waşt ke berpirsîyarê qirkerdişê Meraş û Roboskî û qirkerdişê zîndanan bêrê eşkerakerdene û muhakemakerdene, gorê vindîbîyayeyan bêrê tesbîtkerdene û bêrê teslîmkerdene û hesab bêro persayene.
