Platformê Sazgehanê Demokratîk ê Amedî qezaya Sûr a Amedî de kombîyayîşê şarî yê Aştî û Komelê Demokratîkî organîze kerd. Şar kombîyayîşî de waştişê azadîya Rayberê Şarê Kurdî Abdullah Ocalanî ame îfadekerdene.
Platformê Sazgehanê Demokratîk ê Amedî salonêka veyveyî yê qezaya Sûrî ya Amedî de kombîyayîşê şarî yê Aştî û Komelê Demokratîkî organîze kerd. Rayberê DEM Partî, aktîvîstê TJA’yî, Dayîkê Aştî, rayber û endamê rêxistinanê sîvîl û xeylê kesî beşdarê kombîyayîşî bîyê. Kombîyayîşî de sloganê, “Bijî Serok Apo” , “Şehîd namirin” , “Jin jîyan azadî” , “Bi ca bi xwîn em bi te re ne ey Serok” ameyê vatene. Kombîyayîşî de ewil seba cangorîyanê têkoşînê azadîye rêze ameye girewtene û sirûdê “Çerxa Şorişî” ame vatene.
Çetîn Arkaş o ke 33 serrî hepisxane de mendbi, Aktîvîsta TJA’yî Ayla Akat Ata û endama Buroyê Huqûqî yê Asrinî Razîye Ozturk sey qiseykerdox beşdarê kombîyayîşî bîyê.
‘Ganî peymanêka komelkî est ba’
Avûkat Razîye Ozturk dîyar kerd ke Rayberê Şarê Kurdî Abdullah Ocalan 26 serrî yo binê tecrîdî de yo û xeylê reyan ey ra agahî nêameye girewtene la nika prosesê Aştî û Komelê Demokratîkî rê rayberîye keno. Razîye Ozturk îfade kerd ke dima ke proses da destpêkerdene şar eşkeno fikir û ramananê ey goşdarî û temaşe bikero û wina vat: “Ganî estbîyayîşê şarê kurdî hetê huqûqî ra bêro teqezkerdene. Ganî heqê hêvî bêro caardene. Eya, estbîyayîşê şarê kurdî ameyo qebulkerdene la ganî no estbîyayîş hetê huqûqî ra zî bêro qebulkerdene. Seba şarê kurd û şaranê bînan ewleyî û teqezî lazim a. Ganî peymanêka komelkî est ba, ganî şar ney ra bawer bikero.”
‘Cinî pêşengê prosesî yê’
Aktîvîsta TJA’yî Ayla Akat Ata zî îfade kerd ke cinî pêşengê prosesê Aştî û Komelê Demokratîkî yê û balae ant mitîngê 4ê çeleyî ke do Amed de bêro kerdene ser o û waşt her kes beşdarê mitîngî bibo. Ayla Akat Ata wina vat: “Vatiş û kerdişê îqtîdarî yewbînan nêgênê. Îqtîdar-dewlete hema zî îradeyê şarê kurdî nas nêkerdo. Ma vanê ma do Rojhelatê Mîyanênî de bibê nimûneyêka model. Ma sey cinî merkezê prosesî de yê, ma cinî pêşengîya prosesî kenê. Şarê kurdî demanê tarî ra vîyart. Şarê kurd o wext zî verê xo da Îmraliyî. Ma nika zî verê xo danê Îmraliyî. Ma vanê birêz Abdullah Ocalan îradeyê şarê kurdî yo.”
‘Bê Serekî aştî nêbena’
Çetîn Arkaş o ke 33 serrî hepisxane de mendbi, ey zî qisey kerd û vat: “Rêbazê Rojhelatê Mîyanênî êdî qedîya, Rojhelatê Mîyanên do newe ra bêro dîzaynkerdene. Nê semedî ra îqtîdarî dano beranê ma ro. Eke no proses bi aştî nêqedîyo, ez bawer nêkena ke aştî reyna biba. No proses bê Serek Apo nêyeno çareserkerdene. Dîzaynkerdişê Rojhelatê Mîyanênî de zî şarê kurdî wazeno ke tercîhê xo hetê yewîya şarê tirk reyde bişuxulno. Polîtîkayanê dewlete probleman xorîn keno. Problemê ma şarê tirkî reyde nîyo. Problemê ma îqtîdarî reyde yo.”
