Şeridê Mobiusî, cîsimêko geometrîk o ke teyna yew rîyê xo û yew kinarê xo esto. Cîsimanê normalan de “zerre” û “teber” estê, la no şerid de zerre û teber yew ê.
No şerid, serra 1858î de hetê di matematîkzanê almanan, August Ferdinand Mobius û Johann Benedict Listingî ra, yewbînan ra Bêxebere ame dîyîne. Nameyê xo zî matematîkzan August Ferdinand Mobiusî ra girewto.
Senî vurazîyeno?
Seba viraştişê nê şeridî, şima şenê nê gaman taqîb bikerê:
Yew şeridê kaxizî bigêrê.
Yew sereyê şeridî nêm tur (180 derece) biçarnê.
Sereyê ke şima çarnayo, sereyê bînî reyde pîya bizelemnê.
Xusûsîyetê ci
Eke şima bi qelemêke rîyê şeridî ser o xetêke biancê û bê ke qelemê xo berz bikerê dewam bikerê, şima do bivînê ke xete her di hetê kaxizî ser o zî ameya antene û şima agêrayê nuqtaya destpêkî. Na tecrube musnena ke Şeridê Mobiusî teyna wayîrê yew rîyî yo.
Şeridê Mobiusî matematîk û huner de sey sembolê “bêpeynîye” yeno qebûlkerdene. Çike serê ci de destpêk û peynî çin ê; her tim çerx beno.
