Rojnameyê Xwebûn o ku 21ê Kanûna 2019an de ameya ronayene, sey nameyê nika yê na xeta xoverdayîşî, serra xo ya 6ine temam kerde. Edîtora Xwebûnî Medya Bale seba serrgêra 6ine qisey kerd û va: “Azadiya Welat warê perwerde de yew dibistan bi, la Xwebûnî na yewe resnaye astêka cîya. No semed ra, o depoyê vîrardişan o.”
Vera hêrişanê serê ziwan, kultur û hunerî, çapemenîya azade ya kurdan her tim rolêko pîl girewt xo ser. Vera polîtîkayanê asîmîlasyon, înkar û çinkerdişî, rojnameyê kurdkî mîyanê şarî de bîyî sey dibistanêk. Yew zî na dewaya ke na kehenşopîye domnena, Rojnameyê Xwebûn o. Xwebûn 21ê Kanûna 2019an de ser mîrateyê Azadiya Welatî ame ronayene. Xwebûn, weşangerîye ra sey dibistanêka çapemenîya azade dewam kena û vîrê kolektîf ê şarê kurdî aver bena.
Edîtora Rojnameyê Xwebûnî Medya Bal derheqê sarrgêra rojnameyî de ajansê ma JINNEWS’î rê qisey kerd.
‘Xwebûn, xo naskerdiş o’
Medya Bal dîyar kerd ke rojnameyê Xwebûnî 21ê Kanûna 2019an de ameya ronayene û sey dewamê Azadiya Welatî weşana xo domnena; 6 serrî yo weşanê xo kerdî û bi nê agahîyan dest bi qiseykerdişê xo kerd: “Heta nika ma xeylê projeyî kerdî ci. Seba dewro newî zî do projeyê ma yê neweyî bibê. Sey wendekarêka kurd, mi waşt ke ez xebata xo bi kurdkî bido domnayene û no semed ra mi rojname de dest bi xebate kerd. Ez 5 serrî ya Xwebûn de xebitîyena. Gama ke ma vanî; Xwebûn, o zaf çîyan gêno xo mîyan. Diruşmê Xwebûnî ‘Xwebûn xo naskerdiş o’. No semed ra, gama ke merdim xo nas keno, beno Xwebûn. Xwebûn seba ma yew zanîngeh o, o yew mamoste yo. Çike serê zaf babetan cigêrayîş tede estê. Mesela, Azadiya Welat mîyanê şarî de sey dibistanêk ameyênê vînayene. Eya, Azadiya Welat hetê perwerdeyî ra yew dibistan bi, la Xwebûnî na yewe berde astêka cîya.”
Astengîyê vera ziwanê kurdkî
Medya Bal îzeh kerd ke zordarîya serê ziwanê kurdkî ya ke serran ra nat esta, warê çapemenî de zî dewam kena û dîyar kerd ke xebatkarê çapemenîya azade serran ra nat vera na yewe xover dane û wina va: “La nê xoverdayîşî de, kurdî nika her ca de yenê naskerdene û hurmet înan rê yeno kerdene. Nameyê kurdan her ca de rojeve de yo. La astengîyêka bîn a ke ma rasta aye yenê, tenê polîtîkayê asîmîlasyonî yê hukumetî nîyê; eynî wext de otoasîmîlasyona ke ma serê xo de ferz kenê zî ya. Her ca de ke ma wazenîme bi kurdkî qisey bikerê, ma rasta astengîyanê hukumetî yenê. Seba na yewe lazim bi ke ma xoverdayîş de bibê. Çike ma kurdkî weş nêzanê, zaf kesê ke wazenê çapemenî de bixebitîyê, verê xo danê ziwanê tirki.”
‘Ma wayîrê heqîqetî vejîyenê’
Medya Bal destnîşan kerd ke gama ke ma şarî ra ewnîyenê, tevî averşîyayîşê teknolojî, ajansê xeberan ê bi ziwanê kurdkî zaf nêyênê naskerdene û wina va: “No şerm o. Zaf rojnamegerî serê nameyê azadîya çapemenî de ameyî kîştene. Nazim û Cîhan mîsalê na yewe yê. Ganî ma wayîrê xo û heqîqetê xo vejîyê. Wendoxê rojnameyê ma zaf ê. Xeberê ma tenê Kurdistan û Tirkîya de nê, eynî wext de Ewropa û Rojawan de zî yenê wendene. Zaf kes Xwebûnî weş nênasenê, no semed ra gama ke ma behsê Azadiya Welatî kenê, ê aye nas kenê. Ma wazenî Xwebûnî aver berê, sey ma ke Azadiya Welatî aver berd. Xwebûn ser kulturê Azadiya Welatî ame awankerdene. O ruhêk o.”
Dewro newî de projeyê neweyî
Medya Bale bale ant serê xoverdayîşê rojnamegeran û bi nê vateyan qiseykerdişê xo qedîna: “Çîyo ke ma dano domnayene, xoverdayîş û qelema embazanê ma yê. Ma wazenî hewnê înan ê nêqedîyayeyî biqedînê. Çîyo ke ma dano domnayene mîrateyê embazanê ma yê şehîdan o, ma na yewe sey deynêk vînenê. No semed ra ma xover danê. No semed ra, xoverdayîşê înan dewro newî ya ke verê ma de ya de, ma rê rayberîye keno. Seba dewrê ma yê newî do projeyê ma yê cîyayî bibê. Nuştoxê neweyî û nuştoxê ke verê cû Azadiya Welatî de nuştênê, do tewrê ma bibê. Projeyê ma esto ke ma seba medyaya dîjîtale bernameyan amade bikerê. Ma do dewro newî de bi qewetêko gird qadê xebate de amade bibê. Ma do reng û vengê cinîyan Xwebûn de hîna vêşî bivejê ver.”
