Heyetê Îmralîyî yê DEM Partî û Ozgur Ozelî pêvînayîşî ra pey eşkerayî daye. Ozgur Ozelî dîyar kerd ke ê hem Sûrîye de û hem zî Tirkîya de caardişê heqanê heme netewan ra bawer kenê. Pervîn Buldan zî vat ke ganî her kes nê barî bigîro xo ser.
Heyetê Îmraliyî yê Partîya Têduştî û Demokrasî ya Şaran (DEM Partî) ke parlamentera Wanî Pervîn Buldan, parlamenterê Rihayî Mîthat Sancar û endamê Buroyê Huqûqî yê Seserrî Faîk Ozgur Erolî ra yeno pê, çarçewaya prosesê Aştî û Komelê Demokratîkî de zîyaretanê xo yê partîyanê sîyasî reyde domneno. Endamê Heyetî Merkezê Pêroyî yê CHP’yî de Serekê Pêroyî yê CHP’yî Ozgur Ozelî reyde ame têhet. Pêvînayîşê Heyetî û Ozgur Ozelî saetêkî ra zafêr dewam kerd.
Pêvînayîşî ra pey Heyet û Ozgur Ozelî eşkerayî daye çapemenî.
Ozel: Ganî heqê heme netewan bêrê şinasnayene
Ewilî Ozgur Ozelî qisey kerd û bi şermezarkerdişê heqeretanê cinsîyetperest û nîjadperest ê Bursasporî vera Leyla Zana dest bi qiseykerdişê xo kerd. Ozgur Ozelî wina vat: “Komîsyon merheleya amadekerdişê raporî de yo. Ma hêvî kenê ke raporî her kes qebul bikero û proses encam bigîro û dejî biqedîyê û waûbirayîyêka domdare bêra ca. Ganî hem Tirkîya de û hem zî Sûrîye de seba kurd, tirk, durzî û her kes bi hewayêko ke heqê heme netew û bawerîyan bêro ca û her di dewletî zî waûbirayîyêka domdare bikerê. No do seba heme şaranê Rojhelatê Mîyanênî baş bibo.”
‘Ganî aştî dîyarîya heme hemwelatijan bikerê’
Pervîn Buldan zî dîyar kerd ke pêvînayîşê înan baş bi encam bîyo û wina qisey kerd: “Ma merheleya prosesî ser o qisey kerd ke ma resayê. No proseso tarîxî de ma piştgirîya pozîtîf a CHP’yî zaf muhîm vînenê. Riyê şerî ra na cografya de zaf dejî ameyê vînayene. Ciwanî kewtê binê erdî. Seba ke no dej biqedîyo ganî her kes nê barî bigîro milanê xo ser o. Berpirsîyarîya ma hemînan a ya ke ma aştî dîyarîya heme hemwelatijan bikerê.”
Mîthat Sancarî zî îfade kerd ke no prosesê muzakereyî yo û vat: “Ma zî tîya de muzakereyêka pozîtîf kerde. Ma pîya rexne, endîşe û çîyê ke ganî bêrê kerdene, qisey kerd. Ya muhîme mutabakatêko sîyasî yo. Ma pêvînayîşî de reyna dî ke CHP do prosesî de bi rolê xo yê pozîtîf berpirsîyarî bigîro.”
