Qomê Dersimî seveta Roşanê Gaxanî jîyara Gola Çetû de ame pêser û mîyaze xo kerdî vila, çilayê xo vêşnayî nêtê xo kerd jû venga Heqî da: Gaxane qomê ma rê haştîyê bîyaro, der û cîranan rê, werg û yabanî rê, teyr û turî rê rindîye û weşiye bîyaro. Xoza xo ra wayîr vejime. Xoza ma bi destê zaliman talan nêbo.”
Qomê Dêrsimî seweta Roşanê Gaxanî yê serra newîye jîyara Gola Çetû ameyî pêser û seba serra newîye çilayî veşnayî û loqmê xo kerdî vila.
‘Loqme sima dergehê Heqî de qewûl bibê’
Kombîyayîşê Gola Çetû de verî Mehmet Mûkanî venga Heqî û wina va: “Kûrêşê hewşe û Xizir ma rê wayîrenîye bikero. Nîyazê sima rindîye ser şêro. Loqmê sima, loqmê derya û dengîzî bo, loqmê kûreşî bo, dûzginî bo. Loqmê dewreşê mîlîzî bo. Loqmê pîr û ewlîyanê dersimî bo.
‘Na gola çetû îyê ke serê maderê aqil bido înan’
Nuştox Cemal Taşî qomê xo û şaranê bînan rê haştîye û rindîye waşte û wina dewam kerd: “Gaxanê sima bimbarek bo. Zaf serran bîvêne. Gaxan ke ame, îye ke şîyê teber, amêne çê xo. Roja disemî ra hatan ponseme hîrê rojî sarê ma jûmînî de bîyene haşt. Pîr amêne, kam ke jûbînîde miradîyo, jûbînî de kerdêne haşt. Dewicî şîyêne jûbînî amêne. Teyna zerê çeyî de nê, der û cîranan de, teyr û tûrî de çî esto haştîya înan kî vaştêne. Para înan loqme nêne ro. Kûltire ma de gaxan de gerê wele pak bo, awe pak bo, xozayê ma pak bo. Mal û milk ke nêbî, teyr û tûr ke nêbî, verg û yavan ke nêbî, dar û ber ke nêbî, ma teyna se bikerime. Ma weşîya xo çitur bi ramîme. Na Gola Çetû, îyê ke serê maderê, ma îdare kenê aqil bido ci. Malê yabanî ra kes tawa nêkero, kes bir mevesno, kes jûbinî mekiso. Ma rê têduştîye, haştîye lazima.”
‘Xizir weso, îyê bînî merdê
Heyder Kayayî kî qiseykerdîşe xo de va ke: “Gaxan simarê rindîye bîyaro. Hezretî xizir nîyazê sima qabûl bikero. Xizirê Gola Çetû, Xizirê derya û dengûzû, kam ke gûrbetîye de ro heq weşîyê cî do. Corde heqo, cêr de xiziro. Xizir weso, îyê bînî merdê. Xizir roja tenge de yeno.”
‘Loxme sima bimbarek bo’
Hunermend Kemal Qahramanî kilm qisey kerd va ke: “Gaxane sima bimbarek bo, loxmê sima heq qebûl bikero.”
‘Loxme ma loxme dina bo’
Şaîr Musa Oktayî, zerê şîîrê xo de xeylî mînete kerde û wina va: “Ya gola çetû, ma amêyme bertengê to, mîneta ma qebûl bike, loqmê ma loqmê xo ke. Çar çengê dîna ra vila bike. Zaliman az û ûze ma meke. Malê xizirî saydê zaliman meke. Welatê ma binê destê mixenetan meke. Caran kesî tengede meverde. Ya Gola Çetû, no loqmê ma, verî verg û vesanî de, morê viranî de, teyr û tûrî de, dar û berî de, der û cîranî de, el û yabanî de, qom û qevilî de, çîyê ke mend made. Hermetûnê ma vîya meke, domananê ma sêy meke, cencûnê ma zay meke, dîsmenê ma şa meke. Ya Gola Çetû serra ke verena wa xere ser şêro, serra newîye xer û weşîye bîyaro.”
