Hemserekanê Pêroyî yê DEM Partî Tulay Hatîmogullari û Tuncer Bakirhanî mesajê xo yê serrneweyî de aştî û wayûbiratîye waşt û vat: “Aştîya raştikêne, tena welatêk de ke ma heme seypê û azad bibê, mumkin a.”
Hemserekanê Pêroyî yê DEM Partî Tulay Hatîmogullari û Tuncer Bakirhanî mesajê serrneweyî pare kerd. Hemserekan mesajî de wina vat:
“Ma bi hêvî, pîya dekewenê serrnewe. Serra ke ma xo dima verdaye giran bîye; herêma ma de şer û bêedaletîye ma heme bêtaqet kerdî. La zaf çîyî zî banderê ma kerdî: Ma reyna hêzê piştîpêdayîşî, qîmetê muhîmîya bawerîya aştî daya. Nika ma vernîya xo ra ewnîyenê. Serrnewe, destpêkêko newe yo. Ma wazenê hem Tirkîya de hem Rojhelatê Mîyanênî de bibo serrêk ke tede heme însanî rehetîye mîyan de biciwîyê. No tena waştişêk nîyo; no sozê ma yo ke ma seba naye bixebitîyê.
Ma bawer kenê ke problemêk çin o ke ma bi qiseykerdiş, goşdarîye, fehmkerdişê yewbînan çareser nêkerê. Meseleyê kurdkî ra problemê kede, heqê cinîyan ra heta ameyoxê ciwanan her mesele de çareserîye, cigêrayîşê pîya de yo. Ma sey DEM Partî, seba sîyaset û çareserîyêka ke kesêk teber ra nêverdano, her kesî gêno xo mîyan ma do bi heme hêzê xo bixebitîyê. Ma do kede, seypêyîye, edalet het de bimanê. Çunke ma zanê ke aştîya raştikêne, tena welatêk de ke ma heme seypê û azad bibê, mumkin a.
Wa no serrnewe ma hemînan rê bibo serra aşt, demokrasîyû wayûbiratîye. Hêvîya ma gird a, qerardarîya ma temam a. Ma serrneweyê heme şaranê xo bi hîsanê xo yê tewr safan pîroz kenê. Rojê weşî nezdî yê, ma do pîya awan bikerê.”
