Sûrîye de zereyê rejîmê HTŞ’yî de seba îqtîdarî pêkewtişî hîna zaf benê. Seba îqtîdarî mabênê kardaranê hukmatê demkî yê Şamî de pêkewtiş û hêrişî qewimîyenê. Goreyê tay îdîa û xeberan 30ê kanûne de vera serekê HTŞ’yî Colanî suîqast ameyo kerdene û o ameyo birîndarkerdene.
Sûrîye de zereyê rejîmê Heyetê Tahrîr El-Şamî (HTŞ)de şerê îqtîdarî xorînêr beno. Goreyê xebera Yenî Ozgur Polîtîkayî 30ê kanûne de herêma El Mezzey ya Şamî de mabênê kardaranê HTŞ’yî de şer vejîya, merde û birîndarî bîyê. Goreyê tayê çimeyanê Şamî, hêzê girêdayeyê Wezîrê Karanê Zereyî Enes Hattabî şandê 30ê kanûne de serekê HTŞ’yî Colanî (Ahmed El Şara) rê suîqast kerd. Grûbê girêdayeyê Colanî cewab dayo û şer vejîyayo. Şêwirmendê çapemenî yê Wezîrê Karanê Teberî Esad Hesen Şeybanî Ubeyde Xedban û kardarê ewleyî yê Colanî Ebû Husên El Urdunî ameyê kiştene.
Badê hêrîşanê ke rojanê peyênan ê 2025î de ameyê kerdene, Colanî nêame vînayene. Verfekê Wezaretê Karanê Zereyî Nureddîn El-Babba, eşkerayîya xo ya 4ê çeleyî de îdîa kerd ke xeberê suîqastî raşt nîyê û medyaya HTŞ’yî şandê 5ê çeleyî de dîmenê Colanîyî vila kerdê ke Taxa Mezzeyî de dukkanan de herînayîş keno. Labelê parekerdişê dîmenan de fehm beno ke dîmenî kehen ê.
Colanî beşdarê pêvînayîşê HSD’yî nêbi
Goreyê xebera Yenî Ozgur Polîtîkayî yeno vatene ke Colanî ke suîqast de birîndar bîyo, Tirkîya de yeno dermankerdene la reyna goreyê tayê çimeyan yeno vatene ke nê îdîayî raşt nîyê. Hetê bînî ra Colanî “endîşeyanê ewleyî” ra 4ê çeleyî de beşdarê pêvînayîşê bi Hêzanê Sûrîya Demokratîke (HSD) nêbî. Ame zanayene ke Şam wazeno tim pêvînayîşê HSD’yî reyde seba tarîxêko aver taloq keno.
Fermandarê Pêroyî yê HSD’yî Mazlum Ebdî bi endamanê Fermandarîya Pêroyî yê HSD’yî Sozdar Hacî û Sîpan Hemoyî reyde 4ê çeleyî de şibî Şam ke peymana 10ê adare qisey bikerê. Fermandaranê operasyonê “Inherent Resolve” ra Kevin J. Lambert zî beşdarê kombîyayîşî bi. Hetî seba ke peymana 10ê adare biresnê netîceyêk dewamkerdişê pêvînayîşan de eyn fikir de bîyê.
Şeybanî rê qedexeyê Qesra El Şeebî
Yeno vatene ke tena mabênê Hattab û Colanî de nê, mabêne Colanî û Şeybanî de zî problemî est ê. Heta Şeybanî rê demêko derg dekewtişê Qesra El Şeebî yê Koyê Qasyunî ke sey “Qesra Şarî” yena zanayene û Colanî uca de maneno, ey rê qedexe bîye. O ke nê qedexeyî ronayo birayê Colanî Cemal El Şara yo. Şeybanî nika Qesra Tişrînî de maneno.
Şam de vengê teqîyayîşî
Badê suîqastî rojanê ewil ê aşma çeleyî de zî Şam de vengê teqîyayîş û çekan ameyê eşnawitiş. Keyeyê Çimdarîye yê Heqanê Merdiman ê Sûrîye (SOHR) eşkera kerd ke 3ê çeleyî de herêma Vîlayanê Mezzeyî ya peyê Camîyê El-Muhammedî de ke nêzdîyê cayê ke wezîfedarê HTŞ’yî yê berzî ciwîyenê û nêzdîyê Teyaregeyê Mezzeyî de hîrê vengê teqîyayîşê cîya-cîya ameyê. 4ê çeleyî de zî eynê herême de vengê çekan ameyo, no zî mabênê şarî de bîyo sebebê panîk û tersî. La HTŞ seba ke hedîseyan binimno, nê pêkewtişan sey “tatbîkato askerî” mojneno.
