Tirkîya de key seba çareserî gamêk ameya eştene, nê demî de hêzanê tarîyan dest bi provokasyon yan zî suîkastî kerdo. Sakîne Cansiz û embazê aye çarçewaya na rastî de ameyî qetilkerdene, coka ganî her kes baldar bibo û xo bipawo.
Qetilêk eke bi planê xirabî û armancê lêşinî, kesêk yan zî komêk bikişo, ey rê vanê suîkastker. Tay suîkastê muhîmî est ê ke netîceyê tarîxî heta pêvînayîşê aştî bedilnayê. Qetilkerdişê Sakîne Cansiz û 2 embazanê aye zî na çarçewa de ameyî kerdene. 9ê çeleyê 2013î de Parîs de awankerdoxa PKK’î Sakîne Cansiz û Fîdan Dogan, Leyla Şaylemez bi çekê bêvengî ameyî qetilkerdene. Hîna kiştox dîyar nêbîyo, ê demî Serekwezîr Erdogan bi lez beyanat daybî û vatbî ke ya provokasyon o yan zî hesabê mîyanxoyî yo.
Çîyo balkêş o ke ê demî de Tirkîya de Rayberê PKK’î Abdullah Ocalan û Dewleta Tirk newe ra dest bi pêvînayîşêk kerdbî. 28ê Sibate 2013î de Girawa Îmraliyî de Heyetî ke mîyanê ci de Pervîn Buldan, Sirri Sureyya Onder û Altan Tan est bî, Rayberê PKK’î Abdullah Ocalanî reyde pêvînayîşêk kerd ke tede no qetilkerdiş ame rojeve û wina qisey kerd:
Sirrî Sureyya Onderî, derheqê qetilkerdişê Parîsî de vatişê Rayberê PKK’î Abdullah Ocalanî wina ard ziwan: “Nêzdîbîyayîşê Sakîne weş bî, bi nameyê Koyî (Qandîl) Ewropa de wezîfedar bîye la dewreyê agêrayîşî de çi heyf ke ameye qetilkerdene.”
“Ha ma kiştê ha Sakîne qetil kerde”
Rayberê PKK’î Abdullah Ocalanî malûmatê Sirrî Sureyya Onderî ser wina va: “Ha ma kiştê, ha Sakîne qetil kerde. Qewmîyayîşêko tarî yo. Omer Guney, Ewropa ra yeno Enqere û buroyêk tepişeno. Stêrk vano; MÎT’î kerdo. Mumkin nîyo la ganî ser ci bifikirîyê. MÎT zî nê qewimîyayîşî ra şaş mendo, no zî nîşan dano ke hema zî darbe dewam keno.”
Qetilkerdişêko organîzekerde
Abdullah Ocalanî wina dewam kerd: “Rewşa şima zî nêdîyar a, sey Sakîne. Ganî cayê ke şima şinê tede pawitişê şima yo cewherî bibo. Eke şima rê hêriş bibo, eke şima nêeşkenê vindê, meşêrê ê cayî. Şima zanê ke di rey Ahmet Turk rê hêriş ame kerdene. Hêrişo ke Sakîne rê ame kerdene do ma rê zî bêro kerdene. Ozal ra nika ez mîyanê çareserî de ya. Ganî no proses nêro birnayene, eke nêmcet bimano do felaket bibo. Wa Tirkî zî na rastî bizanê, sernêkewtene do bibo sebebê serwedartiş û heta şerî.”
“Do bedilyayîşê rejîmêk bibo”
Rayberê PKK’î Abdullah Ocalanî pêvînayîş de bale ant bedilîyayîşê rejîmê Tirkîya ser û wina dewam kerd: “Do Tirkîya de rejîm bibedilîyo. No proses hem Tanzîmat hem Meşrutîyet hem zî Komare ra hîna erjaye yo. Çimkî ma do serkewte bibê, Tirkîya û Mezopotamya do bibê demokratîk. Ez heme xebat û felsefayê xo seba hedrekerdişê bedilîyayîşê PKK’î şuxulnena. Eke fam bikerdêne do Ergenekon nêbîyêne, ez verê ra nika Komara Demokratîke pawena la înan fam nêkerd û vat; ‘ma APO qedênayo.’ Xetayê stratejîkî kerdî û Ergenekon esas girewt, ez bawer kena do na rey wina nêbo. Wa AKP bizano ke mi reyde nîno kaykerdiş.”
Proses û rîskê suîkastî
Roja ma ya ewroyêne de, serran ra dima Omer Ocalan û peynî de 28ê kanûne de Heyetê DEM Partî şî Girawa Îmraliyî û uca de Rayberê PKK’î Abdullah Ocalanî reyde pêvînayîş kerd. Demê pêvînayîşî de Rayberê PKK’î Abdullah Ocalanî va ke tecrîd dewam keno. Eke tecrîd dewam bikero, nîşan dano ke Hukmatê AKP û MHP’î nêwazeno çareserî bêro.
Mekanîzmayê darbe ney, na rey mekanîzmayê parçebîyayîşî
Hem têkoşînê Şarê Kurdî hem zî têkoşînê Rayberê PKK’î, Hukmatê AKP û MHP’î bi zorî teşwîqê çareserî keno. Nika Tirkîya de problemê ekonomî ser o şarê Tirkîya wazeno alternatîfêk bibo. Êdî nêeşkenê bi rehetî şarê Tirkîya rê zuran bikerê. Eke Hukmatê AKP’î sey verê biwazo Meseleya Kurdî ser o bi metodê şerê psîkolojîkî nêzdî bibo, do na rey nê mekanîzmayê darbe ney, mekanîzmayê parçebîyayîşî Tirkîya de bikewo merîyet.
Rol û mîsyonê her kesî muhîm o
Nê prosesî de baldarî zaf muhîm a, heta tewr muhîm mesele pawitişê cewherî yo. Çimkî Tirkîya de key seba çareserî gamêk ameya eştene, hêzanê tarîyan dest bi provokasyon yan zî suîkastî kerdo. Çi heyf ke Sakîne Cansiz û embazê aye çarçewaya na rastî de ameyî qetilkerdene. Serra 1999î ra nata Abdullah Ocalan û Dewleta Tirk, heta hêzê kapîtalîstî pêvînayîş kenê, çimkî Abdullah Ocalan bi zanayîşê xo teslîmê înan nêbeno û seba çareserîya Problemê Kurdî xover dano. Ganî heme dorme ra kes bi baldarî hereket bikero, xo qet şenik nêvîno çimkî rol û mîsyonê her kesî seba proses zaf muhîm o. No beno rojnameger bibo, no beno sîyasetmedar bibo, her kes seba prosesî zaf muhîm o.
