Rêxistina DEM Partî ya Farqînî hêrişanê vera taxanê Şêxmexsûd û Eşrefîye yê Helebî protesto kerdî û vat: “Dewleta tirkan hetêk ra vana aştî heto bîn ra hêrişanê xo yê Rojava ser o kêmî nêkena ma nê wehşetan qebul nêkenê.”
Rêxistina Partîya Têduştî û Demokrasî ya Şaran (DEM Partî) ya Farqînî vernîya Camîyê Ecemî yê qezaya Farqînî yê Amedî de derheqê hêrişanê taxanê Şêxmeqsûd û Eşrefîye yê Helebî eşkeryî daye. Temsîlkarê DEM Partî, DBP, TJA û xeylê endamê sazgehanê komelê sivîlî yê qeza tewrê eşkerayî bîyê. Eşkerayî de sloganê “Şehîd namirin” û “Rojava rê hezar selamî” û “Biciwîyo xoverdayîşê Rojava” ameyê berzkerdene.
Rayberê DEM Partî yê Farqînî Nîyazî Sonerî eşkerayî de qisey kerd û vat dewleta tirkan hetêk ra vana aştî û heto bîn ra hêrişanê xo yê Rojava ser o kemî nêkena û wina vat: “Vernî de ma xoverdayîşê Eşrefîye û Şêxmeqsûdî selam kenê û beşna xo şehîdan ver tewînenê. 6 rojî yo vera şarê ma yê Rojava yê taxanê Helebî hêrişî yenê kerdene. Dewleta tirkan senî ke Kobanî de hetkarîya çeteyanê DAIŞ’î kerd, ewro zî Heleb de eynî çîyî kena. Ma tîya ra vengdanê dewleta tirkan ke êdî bes o, wa hetkarî nêdê çeteyanê DAIŞ’î. Hetêk ra vanê ma prosesêk dayo destpêkerdene û heto bîn ra zî hetkarî danê komkiştişanê Rojava. Heme çapemenîya înan eşkerayî dana û vana ma çeteyan reyde yê. Ma zî vanê Eşrefîye Farqîn o, Farqîn zî Şexmeqsûd o. Ma vengdanê heme dinya ke, seserrî yo ke kurdan rê îxanet yeno kerdene. Heme komkiştişî ke yenê kerdene şima şirîkê înan ê.”
‘Ma nê hovîtîyan qebul nêkenê’
Nîyazî Sonerî îfade kerd ke wa kes xo vîr ra nêkero ke keso ke şeref û namusê dinya bixelesno, reyna kurdî yê û wina dewam kerd: ”DAIŞ do bibo belayê heme dinya la kurdan hêzê înan şikit. Ê ke vizêrî vatenê, ‘Kobanî kewena û kewte’ Kobanî nêkewte û serkewte. Wa her kes bizano ke do Eşrefîye û Şêxmeqsûd zî serkewê. Ma vengdanê kesanê ke vizêrî seba Filîstînî hesrî varnaynê, wa ewro Rojava xo vîr ra nêkerê. Komkiştişê tewr girsî Rojava de yenê kerdene û şarê ma ca û wareyanê xo ra yeno koçkerdene. Way û dayîkê ma rastê destdergîyan yenê. Ma nê hovîtîyan qebul nêkenê. Ma do heta peynî hetê şarê xo yê Rojava reyde bê.”
