Bi hêrişanê HTŞ, SMO, DAIŞ û grûbanê cîhadîstan ê vera taxanê Şêxmeqsûd û Eşrefîye yê Helebî, hetê medya yê aparatê şerê taybetî ke waro tewr muhîm o, bi hewayêko zaf eşkera û bi heme hêzê xo vejîya meydan.
Demê hêrişanê qirkerdişî yê HTŞ’yî yê bi piştîdayîşê dewleta tirke yê vera taxanê kurdanê Helebî Şêxmeqsûd û Eşrefîye, Tirkîya de tepşê rojnameger û sazgehê çapemenîye ke zafê înan xo sey ‘muhalîf’ pênase kenê zî kurdan ser o vejîya meydan. Wendişê naye tena sey hezeyanêko nîjadperestî do xelet bo. No bi taybetî nîşaneyê ney o ke çalakîyê şerê taybetî ke Têgêrayîşê Azadîya Kurdîstanî û şarê kurdan ser o heta serranê awankerdişê komare şonê, senî xurtêr û profesyonel bîyê.
Aparatê şerê taybetî ke tesîrê xo yê komelî ser o zanê, warê medya rind şuxulnenê û destpêkê hêrişanê qirkerdişî ra bi heme hêzê xo kewtî dezenformasyonêko xofin. No zî bi taybetî medyaya Tirkîya de kesê ke xo ra vanê ‘muhalîf’ înan kerd.
Roja 6ê çeleyî 2026î de ke hêrişan dest pêkerd, rojnameyê Yenî Şafakî bi manşetêko ke QSD’yî hedef gêno, vejîya. Labelê eynî roje eşkera bîbî ke Îsraîl bi qebûlê Amerîka HTŞ’î reyde pê ameyo.
Hesabanê medyaya sanale yê Serbestîyet û Vazîyetî, cêko ke hêrişanê qirkerdişî yê taxanê kurdan ser o dest pêkerd, temamê inan îdrak û zûran ser o dest bi xeberan kerd. Her çend eşkera bîbî ke zafê dîmenanê weşanîyayan kehen ê zî, tu hewa nê dîmenî nêameyî hewanayene.
Şerê taybet û prensîbê rojnamegerîye
Çend çekuyê ke xeberan de bale ante, est bî. Çekuyê ke tewr zêdê HTŞ û çeteyan rê ameyî şuxulnayene “artêşa Sûrîye” yan zî “Artêşa Ereban a Sûrîye” bî. Nînan reyde hêrişan rê çekuya “operasyon” zî zaf ameyî şuxulnayene. Yew zî rojanê peyênan de pênaseyê “gêrayîş-xelaskerdiş” ame şuxulnayene.
Rojnamegerîye de hem mekteban de hem zî bi pênasekerdişê modernîteya kapîtalîste ya bi serran, pawitişê xo pênaseyê tewr nasbîyaye yê “rojnameger bêtaref o” bale ante. Labelê rojnameger eşkera het o û ziwanê ke şuxulneno, heta dîmenî ke gêno zî pawitişê yew hetî ra yeno kerdene. Pênasekerdişê hêrişêkê ke çeteyê cîhadîstan eşkera seba qirkerdişî kenê, sey “operasyon”, bêterefîye nîya, ne çîyêko bîn o cehdê meşrûkerdişê qirkeran o!
Sansurê medyaya kurdî
Yew çalakîya bîne ya şerê taybetî ke eynî deme de bîye, medyaya kurdî ke çîyê ke qewmîyenê, kena xeber û hêrişan sey xo mojnena, bîye hedef. Verê Tirkîya de sîteyê Ajansa Mezopotamya û Jinnewsî yê medyaya dîjîtale rê asteng ronîyaye. Sîteya înternetî ya rojnameyê Yenî Ozgur Polîtîka ke Ewropa ra weşanîyeno bê behane padîyaye. Newe ra hesabê medyaya dîjîtale yê ANF’yî ke hêrişanê çeteyan û cehdê qirkerdişî mojnenê, asayena înan ame astengkerdene.
Rojnamegerîye hîkayeya yew hetî ya. Kamcî rojnameger beno bibo tew yew wext nêeşkeno bêteref bo. Oyo ke cehd keno ke xo bêteref bimojno zî eşkera het o. Raştîya ke xoverdayîşê Şêxmeqsûd û Eşrefîye û hêrişanê qirkerdişî yê çeteyan de vejîyaye, no yo.
