Dayîkê Aştî ke vera hêrişanê çeteyanê girêdayeyê HTŞ û Tirkîya yê verê xo da Anqara û dîyar kerd ke destê Tirkîya zî hêrişan de est o û vat ke ê seba ke rayedaran ra vajê ke ‘goreyê prosesî têbigêrê û hêrişan vindarnê’ ameyê tîya.
Dayîkê Aştî vakurê Kurdîstan û metropolê Tirkîya ra hemverê hêrişanê grûbanê çeteyanê girêdayeyê HTŞ û Tirkîya yê verê xo da Anqara. Dayîkê Aştî vernîyê awanîya Wezaretê Karanê Teberî kom bîyî û vera hemkarîya Tirkîya ke çeteyan reyde ya, reaksîyon mojna. Dayîkanê Aştî vernîya Wezaretê Karanê Teberî de vengda Hakan Fîdanî ke Rayberîya Xosere ya Vakur û Rojhelatê Sûrîye tehdît keno, îstîfa bikero. Dayîkan mesajanê xo yê Anqara de mojna ke heta hêrişî bêrê vindarnayene û aştîyêka domdar bêra awankerdene ê do çalakîyanê xo bidomnê.
‘Ma waştena aştî de bi israr ê’
Dayîkanê Aştî ra Fatma Yilmaz ke Stenbol ra bi waştena vindarnayîşê hêrişan ameybî Anqara îfade kerd ke ê vera şerî yê û wina vat: “Ma vanê êdî bes o, wa şer nêbo. Wa aştîyêka domdare bêra awankerdene. Ma seba aştî ameyê la ê waştena aştî zî asteng kenê. Şêxmeqsûd û Eşrefîye de şarê ma qir kenê. Ma zî ameyê Anqara ke mesajanê aştî bidê û vajê nê hêrişan vindarnê û wa no şer biqedîyo. Ey se bikerê zî ma do waştena xo yê aştî de israr bikerê.”
‘Çîyî ke Silopî de bîyê Şêxmeqsûd û Eşrefîye de zî qewimîyayê’
Dayîkanê Aştî ra Zeynep Bernîz ke Silopî ra vera hêrişan ameybî Anqara bale ant hêrişanê Tirkîya ser o û wina vat: “Senî ke Silopî de şerê şaristanan de taxê ma ameyê bombabarankerdene, nika zî Şêxmeqsûd û Eşrefîye de taxî ameyê bombabarankerdene. Nika Şêxmeqsûd û Eşrefîye zî sey Silopî û Cizîre binê hêrişan de yê. Bi hezaran kesî erşawitê 2 taxan. Ma zî wazenê Anqara ra mesaj bidê û vajê goreyê prosesî têbigêrê û nê hêrişan vindarnê. Gede, pîr û kalan qetil kenê. Ma nêwazenê kes bêro kiştene. Wa aştîyêka domdare biba.”
‘Hetêk ra muzakere kenê heto bîn ra planan’
Dayîka Aştî Melîha Gokgoz ke Stenbol ra ver bi Anqara ameya, da mojnayene ke kurdan ser o bazarê şerî kenê û wina vat: “Hetêk ra ma reyde muzakere kenê heto bîn ra ma ser o planan kenê û gedeyanê ma qetil kenê. Tarîxê dinya de qetlîamo tewr qilêrin ê vera merdimîye kerd. Hakan Fîdan hemkarîya DAIŞ’î keno. Colanî DAIŞ o. Vera elewî û durzîyan komkiştişî kerdî. Nika zî nê komkiştişan vera kurdan kenê. Ma nê kerdeyanê tedayî şermezar kenê. Wa Hakan Fîdan zî îstîfa bikero.”
‘Destê Tirkîya tede est o’
Dayîka Aştî Emîne Erbay zî dîyar kerd ke ma seba ke vernîya komkiştişan bigîrê ameyê ke vengê xo biresnê rayedaranê Tirkîya û wina vat: “Destê Tirkîya hêrişanê taxanê Şêxmeqsûd û Eşrefîye ser o de est o. Ma vanê aştî la kamca de ya aştî? Ma vanê aştî ê zilm û zordarî kenê. Ma wazenê gonî vindera.”
