Hemsereka Dayîreyê Têkilîyanê Teberî ya Rayberîya Xoser a Demokratîke ya Vakur û Rojhelatê Sûrîye Îlham Ehmed belgeyê qirkerdişê taxanê kurdan ê Helebî eşkera kerdê.
Hemsereka Dayîreyê Têkilîyanê Teberî ya Rayberîya Xoser a Demokratîke ya Vakur û Rojhelatê Sûrîye Îlham Ehmed derheqê hêrişanê Helebî de eşkerayîyêka hîra daye.
Îlham Ehmed bi hewayêko hîra behsê sucanê heme hîrê taxan kerd ke zafêrê 500 hezar sîvîl tede bîyê û mojna ke kamcîn hêzî tewrê hêrişan bîyê.
‘Tena keyeyê mi ra 7 kesî bi dronana ameyê qetilkerdene’
Îlham Ehmed kombîyayîşê çapemenî de ke bi rayîrê zoomî kerd, îfade kerd ke taxa Şêxmeqsûd de keyeyê aye ra tena 7 kesî otobusêk de bi dron ameyê qetilkerdene û vat: “Şêxmeqsûd de tena keyeyê mi ra 7 kesan cuya xo vîndî kerda. Demo ke zereyê otobusêk de benê, bi dronan dayo piro û keyeyê mi ra 7 kesan cuya xo vîndî kerda. Ney ra vete hûmara sîvîlanî ke cuya xo vîndî kerda gelekî ya. Keyeyê însanan talan kerdê. Cenazeyê şervananê cinî awanîyan ra eştê war.”
Îlham Ehmed ard vîr ke taxê Şêxmeqsûd, Eşrefîye û Benî Zêd ê Helebî merdimanî ke Efrîn ra bi zor ameyê koçberkerdene, zafêrê 500 hezar sîvîlî est bîyê û îfade kerd ke nê heme hîrê taxî hetê hêzanê rejîmî ra bi aşman ameyê dorpêçkerdene.
Destpêkê hêrişan
Dewamê qiseykerdişê xo de Îlham Ehmed ard vîr ke 6ê çeleyê 2026î de hukmatê Şamî hêrişêko hîra ê leşkerî berd taxanê Şêxmeqsûd û Eşrefîye ke tumenê 60, 62, 72 û 86 ê artêşê Sûrîye tewrê hêrişî bîyê. Sewbîna vat ke hêrişan de erebeyê zirxî, yewineyê topî yê giranî, roketeştoxê grad û katyûşa, topê hewayî û dronê bombayî ameyê şuxulnayene.
Îlham Ehmed dîyar kerd ke hêriş bi zanayîş binawanîyê sîvîlan rê ameyê kerdene û vat: “Tewrê nufuso vêş ê sîvîlan zî Wezaretê Pawitişî yê Sûrîye taxê Şêxmeqsûd û Eşrefîye sey ‘herêma leşkerî’ eşkera kerdê. Dimayê nê eşkerakerdişî herême bi çekanê giran ameye bombakerdene.”
Îlham Ehmed eşkera kerd ke 8ê çele de grûbê cîhadîst ê ke xeta hişk a Asaib al-Hamra yên El Qaîde ser o yê, ê zî kewtê dewre û hêrişî giran bîyê. Îlham Ehmed wina domna: “Îdlîb û şaristananê bînan ra zî hêzî ameyê. Grûbê SNA’yî bi piştgirîya Tirkîya beşdarê operasyonî bîyê û dewleta tirkan zî bi teyareyanê bêmerdim (Bayraktar) piştgirîya hewayî û îstîxbaratî hêrişî da. Serê sibayî 8ê çele û ey ra pey operasyon hetê Serekê Fermandarîya Pêroyî ya Artêşê Sûrîye Tumgeneral Alî al Naasanî ra ame rayraberdene.”
Hêrişê bejayî û hêrişê vera merkezanê weşîye
Îlham Ehmed dewamê qiseykerdişê xo de derheqê hêrişan de nê agahîyî dayê:
“Dimayê bombardumanê zafêrê 12 saetan, franksîyonê artêşê Sûrîye 7ê çele de saete 21:00î de bi koordîneyî hemverê taxanê kurdan dest bi hêrişê kerd û hîrê hetan ra aver şîyê.
8ê çele de Nêweşxaneyê Osman ê Eşrefîye û Nêweşxaneyê Xalid Fecir ê Şêxmeqsûdî xeylê reyan ameyê bombakerdene ke o wext sîvîlê birîndar, nêweş û personeşê weşîye tede bîyê. Xeylê xebatkarê weşîye ameyê kiştene.
Îşxalkerdişê Eşrefîye û hêrişê vera Şêxmeqsûdî
Mabênê 9 û 10ê çele de Eşrefîye bi temamî îşxal kerde. Operasyonê leşkerî dima ra Şêxmeqsûd ser o ameyê girankerdene. Birîndar, gede, extîyarî keyeyanê xo r eyde Nêweşxaneyê Xalid Fecirî de asê mendê. Bombarduman bi sebeb ke xeylê sîvîl û personelê weşîye cuya xo vîndî bikerê.
Adirbest û berdişo bêçare
Şandê 10ê çele de dimayê pêameyîşê bi mabênkarîya aktoranê mîyanneteweyî serê sibayî 11ê çele de adirbest kewt merîyet. Pêameyîşî reyde karê berişê merde, birîndar û hêzanê ewlekarî yê mendeyan asan kerd. Dima ra şer qedîya û Hêzanê Ewlekarîya Zereyî xo taxe ra ant.”
Bobelato merdimî
Goreyê qeydanê îdarî yê herêmî û belgeyanê hema temam nêbîyê mabênê 6 û 10ê çeleyî de hêrişan de cinî, gede û extîyarî zî tede 47 sîvîlî ameyê qetilkerdene, 133 sîvîlî birîndar bîyê. Tewr kêm 276 sîvîlî vîndî bîyê ke zafaneyê înan bbi keyfî ameyê destbendkerdene.
Hêrişan ra pey koçberîyêka girseyî dest pêkerd û goreyê texmînan 148 hezar heta 155 hezar kurd ê sîvîlî bi zorî taxanê kurdan ê Helebî ra ameyê koçberkerdene.
