Goreyê agahîyan yewîneyê îstîxbaratê tirk Şêxmeqsûd û Eşrefîye de xeylê kesî esîr girewtê û kewtiş û vejîyayîşê taxan asteng kenê.
Hêrişê çeteyanê HTŞ û SMO’yî yê vera Şêxmeqsûd û Eşrefîye dewam kenê. Goreyê tay çimeyanê taxan dimayê qirkerdişê hemverê hêzanê asayîş û sîvîlan sazgeh û dezgehê dewleta tirk ê leşkerî û îstîxbaratî dest dayo her di taxan ser o. Çimeyan dîyar kerd ke kontrolê nuqtayanê kewtiş û vejîyayîşê taxan îstîxbarat û leşkerê tirk kenê û nê agahî dayê: “Her di taxî nika ameyê dorpêçkerdene. Zereyê taxan de cayê nimiteyî viraştê û xeylê kesî ke remnayê ê cayan de verdanê. Goreyê agahîyanê ke ma girewtê derheqê HSD û Rayberîya Xosere de agahîyan wazenê.”
‘Agahîyê înfazkerdişê sîvîlan est ê’
Çimeyan îfade kerd ke cayanê îşxalkerdayan de hemverê welatijan de şîdet yeno kerdene û nê agahî dayê: “Nê semedî ra nêverdanê kes bikewo taaxan. Nêwazenê çîyî ke uca de qewimîyenê û çîyî ke ê kenê bêrê zanayene. Nê semedî ra ne verdenê kes vejîyo û ne zî bikewo taxan. Xeylê kesanê ke waşt şêre keyeyanê xo apey açarîyayê. Sewbîna agahîyê qetilkerdişê tay welatijan zî est ê. Çapemenî zî bi tu hewayî nêzdîyê nê her di taxan nêkenê.”
