Wezirê Karê Teberî yê Yewnenîstanî Yorgos Yerapetritisî, qiseykerdişê xo yê parlamento de va ke do Deryayê Egeyî de parkê deryayî yo diyîn bêro awankerdene û no zî parçeyêkê stratejîya berzkerdişê awa herêmî ya bo 12 mîlan o. Atîna, wexto ke Tirkîya reyde dîyalog domnena, reyna da zanayene ke do babetanê serdestîye muzakere nêkera.
Wezirê Karê Teberî yê Yewnenîstanî Yorgos Yerapetritisî, hedefê Atîna yê hîrakerdişê awa herêmî ya Deryayê Egeyî bi hawayêko akerde ard ziwan. Yerapetritisî qiseykerdişê xo yê Parlamentoyê Yewnenîstanî de îfade kerd ke Ege de do parkê deryayî yo diyîn bêro awankerdene û no gam, parçeyêkê stratejîya vetişê awa herêmî ya 12 mîlan o.
Goreyê xebera ke Deutsche Welle (DW) neqil kerda, Yerapetritisî vato ke parkê deryayî, qonaxo verên ê stratejîya deryayî ya hîraye ya Yewnenîstanî yê. Yerapetritisî va, “Ewro serdestîya ma ya Deryayê Egeyî heta şeş mîlanê deryayî derg bena,” û qeyd kerd ke badê parkê verênî seba parkê diyînî zî amadekarî yeno kerdene û no bi hedefê hîrakerdişê awa herêmî reyde girêdaye yo. Yewnenîstanî verê cû Deryayê Îyonî de awa xo ya herêmî 6 mîlan ra vetbî 12 mîlan.
Tirkîya zî qatî kena ke eke Yewnenîstan Ege de awa herêmî bikero 12 mîlî, na bena sebebê şerî. Qerarê “casus dîyar o” yê Meclîsê Pêroyî yê Tirkîya yê ke 1995 de bi yewvengî amebi qebulkerdene de amebi îlankerdene ke eke Atîna Ege de awa herêmî 6 mîlan ra vêşêr bikero, no hetê Tirkîya ra sey sebebê şerî yeno qebulkerdene.
Heqê serdestîye nêbenê muzakere
Yerapetritisî qiseykerdişê xo de dîyar kerd ke Yewnenîstan do hetê Kibrisî de vinderdişê xo bidomno û pawit ke girave dûçarê “hêrişanê hîbrîdan” bîya. Wezirê yunanî va ke mabênê Atîna û Lefkoşa de paştdayîşêko temam esto, ê bi hawayêko aktîf paştî danê teşebusanê Neteweyanê Yewbîyayeyan (NY) ê seba çareserîya pirsa Kibrisî û çareserî ganî goreyê qeraranê Konseyê Ewleyîye yê NY bibo. Yerapetritisî da zanayene ke helwestê Yewnenîstanî nêvuryayo û va, “Babetê ke heqanê serdestîye eleqedar kenê, muzakere nêbenê.” Nê eşkerayîyî, verê kombîyayîşê ke pawîyeno mabênê Serekkomar Recep Tayyîp Erdogan û Serekwezirê Yewnenîstanî Kyriakos Mitsotakisî bibo de ameyî kerdene.
Goreyê DW, Yerapetritisî doktrînê “Welato Kewoyî” yê Tirkîya zî rexne kerd û na nêzdîbîyayîş sey “qebulnêkerde” name kerd. Wezirê yunanî dîyar kerd ke ê terefdarê domnayîşê dîyalogê Tirkîya yê, la vera naye sernameyê serdestîya neteweyî nêbenê babeta muzakereyî.
Ame vatêne ke Erdogan û Mitsotakis do aşma Sibate de Anqara de bêrê têhet.
