Hepsîyê Hepisxaneyê Ewlekarîya Berze ya Kirşehîrî bi rayîrê keyeyan veng da heme sazîyanê demokratîkan û pawitoxanê heqê merdiman û waşt ke wa her kes seba aştîye veng bido azadîye
hepsîyê PAJK û PKK’yî yê ke hepisxaneyanê Vakurê Kurdîstanî û Tirkîya de yenê tepiştene serra newîye de hemverê hêrişanê Tirkîya û grûbanê aye yê paramîlîteran yê verba Vakur Rojhelatî Sûrîye de beyanat dabi. Nameyê heme hespîyan ser o Denîz Kaya ardbi ziwan ke şarê Rojawanî bi qerar o ke deskewteyanê azadîye yê Rojawanî ke bi fedayîtî û qehremantîyanê pîlan ameyê girewtene, bipawê û wina vatbi: “Ma xoverdayîşê destanî yê şarê xo yê Rojawanî û embazanê xo yê ke hemverê qirkerdişî şer kenê, silam kenê. Şorişê Rojawanî bîyo taca serkewtişî yê têkoşînê ma yê çewres serran. No şoriş hemverê modernîteya kapîtalîst bîyo serkewtişê heme şaranî bindestan. Şerkewtişê Rojawanî pêl bi pêl vila bîyo û wayîrê kararkterêko winasîn o ke tesîrê heme Rojhelatê Mîyanên û dinyayî keno. Roj, roja pawitişê yewîye, xoverdayîş, pawitişê şorişî û wayîrvejîyayîşê felsefeya azadîye ya Rayber Apo ya.”
Beyanatê hepsîyan ê PAJK û PKK’yî ra pey, hepsî ke Hepisxaneyê Ewlekarîya Berze yê Kirşehîrî de manenê, seba ke paştî bidê wayîrvejîyayişê felsefeya azadîye ya Abdullah Ocalanî, bi rayîrê keyeyan vengda. Tepişteyan vengda heme kesanî demokratîk, wayîrê wijdan û pawitoxanê heqê merdiman ke paştî bidê kampanyaya “Veng bidê azadîye” û wina vat: “Ma vengdanê şarê xo û heme rêxistinanê demokratîkan ke paştî bidê kampanyaya “Veng bidê azadîye.” Ma wazenê şarê ma xo tewrê prosesî bikero. Ma zî sey tepişteyanê zindanî tewrê na kampanyayê benê û veng danê azadîye.”
hepsîyan bale ant zilmê ke hepisxaneyan de benê û wina vat: “Hepsî eşkenê roje de saetêk vejîyê teber û hewa bigîrê. Reyna kitaban asteng kenê. Goreyê xo kitaban danê. Kitabê ke hepsî wazenê nêdanê. Wexto ke şonê nêweşxane wazenê fekê hepsîyan ra kontrol bikê. Nê semedî ra hepsî nêwazenê şêrê nêweşxane. Wexto ke hespî verba nê zilman îtîraz kenê wezîfedarî vanê ‘Tîya hepisxaneyê ewlekarîya berz o’. Reyna hepsîyê ke newe yenê hepisxaneyî înan rê gêrayîşê rutî ferz kenê.”
