Parlementerê Parlamentoyê Ewropa yê grûbanê cîyayan reaksîyon da hêrişanê çeteyanê HTŞ’yî ke bi piştîya dewleta tirke vera Rojawanî yenê kerdene û mesajê “Ma şarê kurdî reyde yê” da. Parlementeran bale ante ke ganî xoserîya şarê kurdî bêro naskerdene.
Parlamentoyê Ewropa yê grûbanê cîyayan mesajê xo yê paştîdayîşê Rojawanî nîşan da îfade kerd ke ganî heqê kurdan ê otonomî bêro pawitene.
Ana Mîranda (Îtîfaqê Ewropa yo Azad): “Ma paştîdayîşê xo yê temamî şarê kurdî rê mojnenê. Şarê kurdî vera DAÎŞ’î şer kerd û ganî ma seba haştîya heme dinya paştî bidê înan. Ma sey Îtîfaqê Ewropa yo Azad tim hetê şarê kurdî reyde yê.”
Marîanî Thîerry (Patriots for Europe): “Yewîya Ewropa û Fransa ez hem kor hem zî talûkeyin vînena. Kurdî ke xoserîya înan est bîye ke heta rejîmê Esadî zî nas kerdêne, ganî bieşkê nasnameyê xo yê cîya bipawê. Ma zaf şansdar bî ke kurdan hetê ma de şer kerd. Ewro heqê ma çin o ke ma înan terk bikerê.”
Leoluca Orlando (Kesk/Îtîfaqê Ewropa yo Azad): “Ma piştîdayîşê xo yê kurdanê Rojawanî mojnenê. Ma nêeşkenê qebul bikerê ke kurdî ke hêzê xo yê pawitişê heqanê merdimîye û emnîyetî vera hêrişanê DAÎŞ’î mojna, bêrê qirkerdene. Ganî ma sipasîya kurdan bikerê û înan bipawê.”
