Hesen û Emîna serra 94î de bi zorê dewlete bar kerdo şîyê xerîbîye û hêsîrîye anta. Nika peyser amê dewa xo de weşîya xo ramenê û venga qomê xo danê vanê: “Bêrê dewanê xo, welat û îtîqatê xo ra wayîr vejîyê.”
Hesen Gul û hevala ey Emîna Gule verê 94î weşîya xo dewa Mîrzû de ramnenê ke girêdayeyê Pulurî ya. Ê zilmê 94î da dima bar kenê şonê Stenbol. Xerîbîye ci rê zor yena serranê peyênan de û înan bar kerdo ameyê dewa xo. Nika dewa xo de lovaj, kartol û pîyazan ramenê. Ajansê ma rê barkerdena 94î ser, îtîqat û rindekîya dewe ser o qisey kerd.
‘Dewa ma rindeke bîye’
Hesen Gul, verî behsê talkerdena 94î yê dewa xo keno û wina vano: “Ma Mîrzû de weşîya xo ramitêne. Ma bi zor dewa xo de vetîme. Bar kerdîme şîme Stenbol, nasî çinîbî, kîra de mendîme. Ma hewt serrî dewa xo de durî mendîme.” Hesen û Emîna çend serrî ra dima peyser ke yenê dewa xo endî ban û manê xo çinê. Zemanê hetê cîrananê xo de manênê. Dima zî bi dên xo rê hebê bananê qijan virazenê. Wisarnan yenê dewa xo de lovaj, kartol, bîber, pîyaz çî mî ramenê û heta payîzo peyên dewe de manenê.
“Payîz ke ame some Stenbol. Welatê ma rindek o, cayê ma kî rindek o, eke sarê ma rind bo her çî beno rind. Cîran cîranî ra hes bikero, bira birayî ra hes bikero. Zerê xo de aşt bime. Sarê ma verên jêde nêmendo. Ma şîyêne jiyarû ser qirvan kerdêne, mîyaz vila kerdêne. Rojê Xizirî de Cem girêdêne, Pîr û Kalikanê ma vatêne ‘mîyanê qome xo de qîymetê jûmînî bizanê.’ Verênde mal kerdêne weyî, qatix bî, korek ramîtêne, cew ramitêne, genim ramitêne, lovaj, gartol û pîyaz ramitêne. Payîz ke ame, şîyêne çî ke kemîyo, gûretêne ardêne, hatanû çêrangan eştêne pêser. Hetanû wisar ma pê îdare kerdêne.” Vano.
‘Hardê xo ra wayîr vejîyê’
Xatirê welatî zanitene, îtîqat û kulturî zanitene ser o vindeno û wina vano: “Qomê ma ra vana welatê xo ra durî mevinderê. Hardê xo ra wayîr vejîyê. Bêrê bonanê virazê, hêgayanê xo biramnê, cayê xo ra jîyaranê xo ra wayîr vejîyê. Juminî de xayînîye mekerê. Çar rojî dîna de rindîye bikerê.”
‘Dewa xo ra zaf hes kenîme’
Emîna Gule dewa xo û Dêrsimî ra zaf heskerdene ser o vindena vana ‘Ximalo Dêrsim o’ wina vana: “Ma dewe ra vetîme, ma towa teyê xo nêberd, heşîrîye amê ma ser. Kaş bîme şîme tever. Hatan nika kîra de bîme. Bese nêkon şêrî tever, key ke şîyane tever, kokimane, bese nêkon tepîya berî welatê xo. Qomê ma de îtîqat jêde nêmendo. Dewa xo ra zaf heskon. Verên de şîyêne şevel bawa, şîyêne yel bawa, şîyêne hewşa sey Mizûr. Îyêke feqîrê heşîrî ye zaf vînene. Zengînan rê towa nêbeno. Estanbol bi vesêne, dewa ma nêveşêne. Ximalo Dêrsimo.”
