Fermandarê Pêroyî yê HSD’yî Mazlûm Ebdîyî îfade kerd ke tayê babetan ser o Hukmatê Şamî reyde pêameyî û nê babetan ra tewr verêne zî ganî Artêşa Şamî nêkewo Rojawanî û do teber ra bimana.
Fermandarê Pêroyî yê HSD’yî Mazlûm Ebdîyî ke Ronahî TV’yî rê qisey kerd, derheqê pêvînayîşanê bi îdareyê Şamî û hêrişê ke dewam kenê de erjnayîşê muhîmî kerdî. Ebdîyî ard ziwan ke seba ke pêkerdişî temam bikerî cehd kenê û vat herêmanê kurdan de çew nêeşkeno ser bikewo.
”Seba ke wextê adirbirnayîşî de tay gamî bêrê eştene ma cehd kenê. Hîrê madeyê bîngeyî est ê. Ma wazenê herêmê kurdan wa destkewteyanê xo bipawê û tîya de şer nêbo. Hem îdare hem zî kultur û ziwan ganî bêrê pawitene. Nînan ser pêkerdişêk est o la hema babetê ke ganî bêrê çareserkerdene, est ê.
Hesekê mîyanê Sûrîye de bêro muhafazakerdene. Heta nika Îdareyê Xoserî tîya îdare kerdêne. Dezgehê Îdareyê Xoserî est ê û ganî nê bêrê pawitene. Nê dezgehî mîyanê awanîya dewlete de senî yenê entegrekerdene, nînan ser munaqeşeyî yenê kerdene.
Tay babetê ke bîyî safî est ê. Hêzê Asayîşê Zereyî do cayê xo de bimanê û pîya bi dewlete karê xo bikerê, no nînan ra yew o. Entegreyê HSD’yî ser munaqeşeyî dewam kenê. Ma wazenê nê pêkerdişî bîyarê ca û ma hêvî kenê ke rojanê verê ma de bêno safî.
Wextê adirbirnayîşî de tepişteyê DAÎŞ’î ke herêmê ke binê kontrolê me de yê, do bêrê transferkerdene. Eynî wextî de ma do serê vinderê ke pêkerdişo bi Şamî bêro caardene. Hedefê ma o yo ke pêkerdiş bêro caardene. Goreyê pêkerdişî artêşa Sûrîye ganî mekewo dewe û bajaranê kurdan. Ma semedê dîyalog û caardişê pêkerdişî xeylê kombîyayîşî kerdî.
Kanalê resnayîşî yê mabênê ma akerde yê. Ma eşkenê rojane pêvînayîş bikerê. Amerîka mîyanê nê prosesî de ya. Serekkomarê Fransa Macron zî bi hewayêkê xurtî mîyanê prosesî de yo. No proses eşkera yo, her kes zano sebeno, nêbeno. Ma semedê dezgehanê ke tede ca genê nameyî zî pêşnîyaz kerdî. Pozîsyonê sey Walîtîya Hesekê û Wezîrîya Pawitişî ya naye rê nimûne yê.
Ma wazenê vera şarê xo zelal bo. Pêvînayîşî est ê la pêkerdişo qetî çîn o. Ma tay nuqtayan de pêkerd, tay çîyê ke ma ra yenê waştene û tay çîyê ke ma wazenê est ê.Tay çîyê ke hukmatê Şamî qebul nêkeno est ê. Eke şertanê ke ma qebul nêkenê ma rê ferz bikerê, beno ke no pêkerdiş ser nêkewo.
Hetê îtîfaqê kurdan ra ma demê holî de yê. Kurdî bîyî yew. Ruhê yewîye yê wextê têkoşînê vera DAÎŞ’î yê 2014 newera ame pê. Hetê sîyasî ra zî partîyê kurdan paştî danê Rojawanî. Mi pêro rayberanê kurdan de reyde pêvînayîş kerd, pêrune paştî dayî û aktîf xebityenê.
Nê demî de kurdan û dostan ke paştî daye Rojawanî e înan selam kena. No tewiro xurt ke vejîya werte tesîrê hêzanê mîyanneteweyî û hukmatê Şamî kerd. Paştdayîşê Kurdan, Ewropa û cayanê bînan ê dinya prosesî ser tesîro pozîtîf kerd û moral û hêz da ma. Heta ke dewaya kurdan a Rojawanî bêro çareserkerdene ganî no paştdayîş bi xurtkerdişî dewam bikero.
Kobanê senî ke 2014 de ablûqaya DAÎŞ’î şikna do ewro zî bişikno. Serkêşîya nê prosesî do reyna Kobanê bikero. Ma hukmatê Şamî ra waşt wa Kobanê û dewanê ci mekewê, no qebul kerd. No hesasîyet dî. Seba ke xoverdayîşo dahîna gird nêro kerdene, ma wazenê wa sozê xo tepişê.
Semedê ma mabênê Kobanê, Efrîn û Qamişloyî de qet ferq çîn o. Ma nê pêkerdişî de qala xoserîya kurdan kenê. Nê semedî ra kesê ke cayê xo ra pêzorî ameyî vetene ganî agêrê waranê xo. Pêrkerdişo ke semedê Qamişlo û Kobanê beno ganî semedê Eferîn û Serêkanîyê zî bibo.
Vera şarê kurdî heqaretê giranî û caardişê ke nînê qebulkerdene ameyî kerdene, hesabê înana do bêrê persayene. La ganî ma destur medê şovenîstî mabênê şarn de dişmenî biafirnê. Mîyanê HSD’yî de zaf erebî est ê, bi hezaran şehîdî dayî. Ganî ma meverdê dişmen şaran biverdo pê.
Seba ke şerê zereyî yo bêmana mero kerdene ma Tebqa, Reqa û Dêrazorî ra ancîyayî. Waştişê ma binfînayîşê DAÎŞî bi. Gama ke warê dişmenî ame pêardene waranê ke kurdî tede zafê înan rê ame agêrayene. Ewro herêmê kurdan yenê pawitene û nê xetê ma yê sûr ê. Heta şervanê ma yê peyênî do bêrê pawitene. Çew nêeşkeno tîya de ser bikewo.No şer leşkerî nîyo, eslê xo de tekoşînêko sîaysî yo.”
