Meclîsê Şingalî yo Xoser û Demokratîk (MXDŞ) dîyar kerd ke çeteyê DAIŞ’î ganî Mûsil de nêbê û vat ke çeteyî seba êzîdîyan û heme endaman tehdîtêko girs virazenê.
MXDŞ’î derheqê neqlkerdişê çeteyanê DAÎŞî yê Sûrîye yê Iraqî de eşkerayîye weşanaye.
‘7 hezar çeteyan anê Iraq’
Eşkerayîye de ame vatene: “Goreyê xeberan, zaf çeteyî ameyî veradayene û teqrîben 7 hezar çeteyî ke tena 1500ê înan iraqij ê û yê bînî xerîb ê, bi qebulkerdişê hukmatê Sudanî yeno şawitene Iraqî. Nê çeteyê DAÎŞî yê xofinî ke seba emnîyetê herême tehdîtêko girs ê, endîşeyê ma zêde kerdî. Her çiqas vajîyo ke ê tîya de mende nîyê zî, zanîyeno ke estbîyayîşê înan herêma ma de sey bombayêka nêteqîyaye ya.”
‘Ma qebul nêkenê ke çeteyî bêrê Mûsil’
Eşkerayîye de bale ame antene ke sey komelê êzîdî û MXDŞ’yî, estbîyayîşê çeteyan ê Iraqî seba emnîyetê xo tehdîtêko girs vînenê û ardişê nê çeteyan ê Mûsil bi tu şeklî qebul nêkenê. Ame vatene ke ganî çeteyî ke seba heme bawerîyan tehdît ê, herêman ra ke verê tede jenosîd kerdo, dûrî bêrê tepîştene.
‘Ganî çeteyî bêrê muhakemekerdene’
MXDŞ’yî venga heme şaranê Mûsil û Iraqî da ke vera ney vinderê û nêverdê ke çîyê ke Sûrîye de kerdî tîya de zî bikerê. Ame vatene: “Welatanê ke jenosîdê êzîdîyan nas kerdo, ganî seba muhakemakerdişê çeteyan berpirsîyarîye bigîrê û peyê qeraranê xo de vinderê.”
