Endamê Karwanê Şaran ke ciwananê enternasyonalîst ra yeno pê, dîyar kerd ke ganî ê yewbînan het de vinderê û her kes paştî bido Şorişê Rojava û vat: “Çareserî xorêxistinkerdiş û awankerdişê komunan o.”
Çeteyê HTŞ û SMO’yî bi hemkarîya dewleta tirkan hêrişê Rojava kenê û wazenê Rojava îşxal bikerê. Vera hêrişan Vakur, Başûr, Rojhelat, Tirkîya û welatanê Ewropa de çalakî yenê kerdene. Kolektîfê RîseUp4Rojava (Seba Rojava Wirze We) ke grûbêka rêxistinanê şorişgir ra yena pê çarçewaya seferberîya pêroyî de bi kampanyaya “Karwanê Şaran” vengdayîşê şîyayîşê Rojava kerdbi. Endamê karwanî ke ameyê Stenbol derheqê amancê ameyîşê xo de ajansê ma rê qisey kerd.
‘Ganî ma sey cinîyê Ewropayijî wayîrê nê şorişî vejîyê’
Ciwanan ra Anna Ellenberger dîyar kerd ke a şorişgirêkê Almanya ra ya, endama Înîsîyatîfê Konfedaralîzma Demokratîk a û wina qisey kerd: “Mi di serrî û nêm ra ver şorişê Rojava nas kerd. Kese ke tewrê Rojava bîyê ma rê behsê Rojava kerdbi, naskerdişê min ê Rojava wina bi. Şorişê Rojava şorişê seserra ma yo. Cinîyê ke Rojava de xover danê ez yad kena. Ganî ma sey cinîyê Ewropayijî wayîrê nê şorişî vejîyê. Seba ke dewleta ma hetkarîya Colanî kena. Ma sey cinîyê Ewropayijî ma dî ke ma zî binê teda de yê. Seba ney zî ganî ma wayîrê xoverdayîşî vejîyê.”
‘Ganî ma nê şerî vindarnê’
Anna Ellenberger peynîya qiseyekerdişê xo de îfade kerd ke ê do seba şaranê Rojava bêrê tehet û nê çîyî vatê: “Dem demê berzkerdişê vengê Rojava yo. Ganî destê ma ra çi bêro ma bikerê, xora dem demê ney o. Ez dewletan ra bawer nêkena û dewleta ke ez tede ciwîyena, a zî mi temsîl nêkena. Vengê Rojava bi parlamentoyanê Ewropa berz nêbeno. Çareserî xorêxistinkerdiş û awankerdişê komunan o. Ganî ma vera nê şerî berpirsîyarîyanê xo bîyarê ca. Seba Rojava wa her kes wirzo lingan ser. Biciwîyo xoverdayîşê Rojava.”
‘Ganî herkes paştî bido şoreşê Rojavayî’
Ciwanan ra Nico Ehrenbergerî dîyar kerd ke o bi hisanê şorişgirî ameyo tîya û wina vat: “Ma no demêko derg o çalakîyanê bi nameyê ‘Têkoşînê enternasyonalîst berz bike” organîze kenê. Mi uca de embazê kurdî nas kerdê. Demo ke agahîya mi Karwanê Şaran ra bîye mi waşt tewrê karwanî biba. Ganî ma yewbînan het de vinderê. Şarê Almanya zî vano ‘ma demokratîk ê’ eke wina bo ganî paştî bidê Şorişê Rojava. Şarê Ewropa eşkenê xeylê çîyan bikerê. Xeylê kesî serranê peyênan de zaf çîyî Şorişê Rojava ra musayê. Ma zî vanê ganî herkes Şorişê Rojava het de vindero.”
‘Ganî ma paştî bidê yewbînan’
Wiktoria Fremde Tischlerin zî dîyar kerd ke serra 2017î de ey Şorişê Rojava nas kerdo û vat: “2 serranê peyênan de ez tewrê çalakîyanê seba Rojava bîya. Tewr peyên zî çîyê ke Rojava de qewimîyenê, mi dîyê. Mi ê hêrişî xo ser o his kerdê. O wext zî mi fehm kerd ke ganî ez tay çîyan bikera û bikewa rayîr. Vengdayîşê mi seba hemrayanê mi ê enternasyonalîst o yo ke wa bêrê têhet û ma pîya wirzê lingan ser. Ca ferq nêkeno ganî ma bêrê têhet û paştî bidê yewbînan.”
