Hemsereka DBP’yî Çîgdem Kiliçgun Ucare derheqê pêkerdişê mabênê HSD û Şamî de qisey kerd û va: “Bi nê pêkerdîşî ra dima ez eşkena vajî ke letê Kurdîstanî yê didîne de sîyasetê înkarî werte ra darîya ve. Paradîgmaya birêz Ocalanî sere de xoverdayîşê QSD û şarê Rojavayî û heme kurdanê çar parçeyan yê dinya û dostanê kurdan hurînda xo dîye.”
Hemsereka Pêroyî ya Partîya Herêmanê Demokratîkan (DBP) Çîgdem Kiliçgun Uçare derheqê adirbesto ke mabênê hukmatê Şamî û Kurdanê Rojavayî de ameyo viraştene û manêyê nê adirbestî ser Ajansê ma rê qisey kerd.
‘Hêzanê hegemonîkan waşt ke kurd û erebî jûbinî de şer bikê’
Çigdem Kiliçgun Ucare adirbestî û pekerdişo ke mabênê kurdan û hukmatê demkî de ameyo viraştene vengdayîşê Rayberê Şarê Kurd Abdullah Ocalanî yo ke 27 Guciga 2025an de ame kerdene yewbinî ra girêdana û wina vana: “Nêzdîye jû aşmeyo ke Sûrîye de serê şarê kurdî de şerêko giran est o. Jû serre nayera ver vengdayîşê birêz Ocalanî bî, aye ra nahetêrî kesê ke nêameyêne têlewe ameyî têlewe û persa kurdan çitur çareser bena ser qisey kerd.
Ma dî ke dewleta tirkîya wazena ke nê prosesê aştî û demokrasî bi şerê Sûrîye berdewam bikero. Ma dî ke şero ke Sûrîye de yeno ramitene teyna mabênê HTŞ û QSD’î de nêbî. Mîyanê nê şerî de dewletê netewî û dewletê dinya bî. No şer mabênê ceynîyan û îktîdarê carmêdan de bî. No şer mabênê dîktatorîye û azadîyê de bî.
Hêzanê desthilatdaran û hegemonîkan waşt ke kurd û erebî jûbinî de şer bikê, pêrodê. Şarê Sûrîye mîyanê xo de şerê zereyînî bikerê. Henî nêbî. O roje ra heta nika temsilkaranê kurdan, QSD înan pêrûne şer nêwaşt, va ke ‘ma şikînîme dormeyê jû masa de bême têlewe û muzakere bikime. Ma şikînîme çareserîyê bivênime.’
‘Xoverdayîşê kurdan encam girewt’
Çigdem Kilicgun Uçare bale ante serê xoverdayîşê kurdan û dostanê kurdan û wina vatena xo domnê: Zerê na jû aşme de hem Sûrîye û Rojava de hem Tirkîya de, hem Rojhelat de û Başûr de hem kî her hetê dinya de şar o kurd û dostê kurdan pêropîya vejîyayî teber, serê lingan de bî. Vat ke ‘Rojava çimê ma yo, Rojava dilê ma yo, Rojava zerê ma yo. Ma nêverdanîme oncîna şer bibo.’
Jû çîyêde bîn est o; heta nika rayberê şarê kurdan xoverdayîş ra tepîya amêne dardekerdene, dewlete rayberê kurdan îxdam kerdêne. Ewro jû proseso newe est o verê şarê kurdî de. Raya verêna zerê şerî de masaya muzakereyî ama ronayene û rayberê kurdan hetê de na masaye de ronîşteyê. Rayberê şarê kurd Abdullah Ocalan û QSD israr kerd va na mesela pê şer nê pê muzekereyan yena çareserkerdene û înan qezenc kerd. Na mesela yê rojê di rojan nîya. Meseleyêka girana, kamcî dewlete na mesela bi raya demokrasî û aştîye hal kena ma zanîme ke çîyê de rind kena.”
‘Dewleta tirke waşt no pergal vîndî bibo’
Çigdem Kiliçgun Uçare pergalo ke bi desan serrî yo bi bedêlanê giranan Rojavade ameyo meydan ser vindena û vana dewleta tirke û çeteyan waşt ke nê pergalî xirabe bikê. Wina va: “Mabênê HTŞ û QSD’yî de adirbestê ame viraştene, no çîyê de rind o. Şar û rêxistinanê Rojavayî heta nika nê des serran de bi dest û nenûganê xo, ked û emegê xo no pergalê Rojavayî viraşt bî. Dewleta Tirke û dewletanê bînan terba hukmatê Şamî waşt ke no pergal vîndî bo. Heqê şarê kurd û şaranê Sûrîye mebo. Eke dîktatorîye bibo ey karê xo tayêna rind vênenê. Ama hem xoverdayîşê şarê kurdî hem xoverdayîşê dostanê kurdan çîyê vet orte. Ma encamê nêy hem adirbest de vînenîme hem kî pêrodayîşê înan û şarê kurdî de vînenîme.”
‘Bi nê pêkerdişî sîyasetê înkarî werte ra darîyawe’
Hemsereka DBP’yî peynîya qiseykerdişê xo de maneyê nê adirbestî û pêkerdişî ser vindena û sey rojêka tarixîye vînena: “Jû rastîye vejîye werte a kî nîyara; leteyê Kurdîstanî yê didîne de sîyasetê înkarî werte ra darîya we. No adirbest hem vernîya heqanê şarê kurdî hem ki vêrnîya heqanê şaranê bînan keno ya. Heta nika ma serba entegrasyonêko demokratîk qisey kerdêne. Pêkerdişê nê adirbestî de henî aseno ke vernîya statuyê şarî kurdî û entegrasyono demokratîk yeno hurînde. Hem paradîgmaya birêz Ocalanî, hem emegê şarê Rojavayî û QSD’yî hurînda xo dîye.
Ewro ma rê çi lazimo çi hewceyo aye kî vajî: Yewbîyayena şarê kurd û dostanê înan reyna hewceyo. Çike no adirbest cuya xo rameno nêrameno ma nêzanenîme. Ma oncîya çalakîyanê xo yê demokratîk, ma oncîya hem seba Rojavayî hem kî seba ameyoxê xo vengê xo vejime. Çike ma zanîme ke no adirbest teyna Rojavayî û şarê kurdî rê nê şarê Sûrîye rê zî demokrasî û azadîye ano. Hem kî Rojhilato mîyanên de bingeyê demokrasî û aştîye keno xurt.”
