DEM Partî nerazîbîyayîş mojna destbendkerdişê rayber û endamanê ESP û rojnamegeran daye û waşt ke destbendkerdeyî ca de bêrê veradayene.
Serê sibayî tede Hemserekê Partîya Sosyalîst ê Bindestan (ESP) Mûrat Çepnî û rojnamegerî zî est ê 96 Sosyalîstî ameyê destbendkerdene. DEM Partî serê hesabê xo yê X’î de reaksîyon mojna destbendkerdişê 96 kesan.
Eşkerayîya DEM Partî wina ya:
“No sodir xeylê xebatkarê temsîlîyetê ma ESP û SKM, DÎSK/LÎMTER-ÎŞ, BEKSAV’î netîceyê eştişê keyeyan ser ameyê destbendkerdene.
Tede Hemserekê Pêroyî yê ESP’î Mûrat Çepnî û Endamê Meclîsa Partîya ma Emîn Orhan, rojnameger, ekolojîst û sendîkavanî est ê ameyê destbendkerdene.
Na polîtîkaya şidetî ke îktîdar bi destê hukmî verva sosyalîstan keno, nîno qebûlkerdene. Ganî kesê ke ameyê destbendkerdene tavilî bêrê veradayene.
Sewbîna welatijê ma yê ke protestoyanê verva hêrişanê serê Rojavayî de ameyê destbendkerdene û girewtene ganî bêrê veradayîşî û ganî tedaya verva kesanê ke reaksîyonê xo mojnenê bêro vindartnayene.”
