Serra 1994î de wexto ke dewlete dewa Temkû kerde tal Alî û embaza ey Turkane bar kerd ameyî Pulur. Nika Pulur de çetinîya zimistanî de naxira dawarî kenê weye. Bêrîya dewa xo kenê. Seba vewra zafe vanê: Emser vore dûyê ma dard we.”
Alî Sûskûn û hevala ey Turkan Sûskûne verê 94î weşîya xo dewa Pulurî Temkûne de ramitêne. Wexto ke dewlete dewa înan kena tal bar kenê yenê Pulur. Debarê xo bi weyekerdene heybanan vînenê.
Pulur de zimistan emser goreyê serranê bînan hebê çetin vêreno ra. Çike vewre zaf vara. Alî Sûskûn van o “Emser vore dûyê ma dard we.” Çetinîya zimistanî nîya ano ziwan. Heto bîn ra zî zano ke zaf varayena vewre rind a. Wina vano: Çend serrîyo vore zaf nêvarêne awê ma ancîyêne, ma bê awe mendêne, varayena vore rind a.”
Ma bîme meymanê Turkan Sûskûn û Alî Sûskûnî, înan zî ajansê ma rê qisey kerd.
‘Her çi herêneyîş ra beno’
Nika her çî bi herênayîş o û fîyatê xo zî zaf vay yo, aye ra Alî Sûskûn nê semedî ra gazneno û wina vano: “Zimistanî qaytê naxira xo keme. Çî danîme cî, binê naxire gejî kenîme, Vore erzenîme. Çend serîyo ke vore nêvara. Emser zaf vara. Vore duyê ma dardo we.
No kar girano, ma pê îdare nêkenîme, tede kûnîme zere. Dêndar, dêndar hîn sonîme. Dewa ma kerde tal. Ma îtade vas herînenî me, sîmer herînenîme, axûre her çî pere yo. Bonê ma kerdî tal ma bar kerd ameyme Pulur. Dewa ma de, naxir sono çereno yeno. Îta henî nîyo. Dewa ma zê cenet bîy.
Ma dewe de cîte bi golîgan kerdêne. Siro ke wisar bîyêne ma cîte ramitêne, nîyazê xo berdêne lewê cîte de vila kerdêne. Wisar ke bîyêne ma nîyaz berdêne verê malî de vila kerdêne. Şîyêne jîyaran ser.”
‘Dewa xo hewn de vînena’
Alî Sûskûn, dewa ser qiseykerdişê xo wina ramneno: “Dewa xo hewnê xo de vînena. Ma naxirê xo guret şime dewa xo, panc serrî mendîme, sêr kerd ke kes nêno, peyser ameyme Pulur.
Rind ke vore varena, awî ancîyê, ma payîz şîme dewa xo, lewê mezelûnê ma de hênîyê bî, her serre awe pira zaf ameyne, emserr ûncîya şîya. Vore her cayî kena rind, awî benê zaf. Aştîye bêro ma şêrîme dewa xo. Aştîye bero zaf rind beno. Ma dewa xo ra zaf heskeme.”
‘Dewa ma rindeka, Pulur husk û holo’
Turkan Sûskûne, hetê ra mangaya xo doşena, hetê ra zî ma de qisey kena û seba cuya xo wina vana: “Dewa ma rind bîye. Dewa verêne de her çî bîy. Na Pulur husk û holo. Çi esto pêrûne herînenîme. Ma dewa xo de şîyêne jîyar ser, qirvan kerdêne. Nîyaz vila kerdêne. Nika hîn nîyo, her çi darîyo we. Nê rojê Xizirî de roje cênîme, loqme vila kenîme. Verênde zaf şîyêne jîyar ser. Ma zonê xo vîra nekenîme. Zonê xo rê wayîr vejîyê. Dewa ma 30 serrî yo ke tala.”
