Wasîyê Rayberê Şarê Kurdî Mazlûm Dînçî vat ke paradigmaya Ocalanî tena seba kurdan ney, seba heme şaranê Rojhelatê Mîyanênî şans a û ganî herkes azadîya Ocalanî biwazo.
Wasîyê Ocalanî avûkat Mazlûm Dînçî vat ke Ocalanî hêrişê ke vera Rojawanê Kurdîstanî ameyî kerdene, sey komployêka mîyanneteweyîye nirxnaye û seba ke nê hêrişî pûç bivejîyê mudaxeleyê muhîmî kerdî. Dînçî ard ziwan ke Ocalanî verê hêrişan de hişyarî dabî û vatbî ke HTŞ zihniyetê DAÎŞ’î yo û eke firsend bivîno do kurdan qir bikero.
Dînçî vat ke hêzê hegemonî 100 serrî yo sîyasetê xo kurdan ser o ferz kenê û wazenê ke bi birîndarkerdişê kurdan Rojhelatê Mîyanênî îdare bikerê, la Ocalanî nê kayî hermneno.
Dînçî sewbîna vat ke paradigmaya Ocalanî ya “Wayûbiratîya Şaran” û “Konfederalîzma Demokratîke” tena seba kurdan ney, seba heme şaranê herême şans a. Goreyê Dînçî, statûyê kurdan çi bibo xoserî, federasyon yan zî dewlet ganî bingeyê wayûbiratîya şaran û demokratîkbîyayîşî ser o bibo.
Derheqê tecrîdî de Dînçî vat ke avûkat û keyeyê Ocalanî çend aşman ra yo ke nêeşkîyayî ke biresê Ocalanî û ganî tecrîd bêro hewanayene ke Ocalan bieşko rolê xo kay bikero.
