Şaristanê Kobanê hetê grûbanê hukmatê demkî yê Sûrîya ra 19 rojî yo ameyo dorpêçkerdene.
Grûbê Hukmatê demkî yê Sûrîya bi nê dorpêçî wazeno şarê Kobanî tengezar bikero û îradeyê înan bişkino. Şaristanê Kobanî de nêm mîlyon merdimî ciwîyayene. Keyeyê Kurdî yê Reqa,Tebqa, Eyn Îsa û Koçberê Efrîn û Şehbayî semedê hêrişan ameyê kobanî de bi ca bîyê. Sewbîna zî tayê dewanê Kobanî seba pawitena gede, nêweş, kal û pîran verê xo daye şaristanê Kobanî.
Kobanî hem berpisyarîya koçberê ke bi darê zorî herêmê xo ra koç kerdê wedarito, hem zî verva hêrişan xover dana. Hetê weşîye ra zafê dermanan nînê peydakerdene, bi taybetî kesê ke nêweşîya şekir, tansîyon û gurçikan est a, zehmetî ancenê. Sewbîna zî kesê ke nêweşîya qanserî vînenê semedê dorpêçî nêeşkenê tedawîya xo dewam bikerê.
Hukmato demkî bi nê dorpêçî ke metodê şerê taybetî yo, wazeno Kobanî de krîzê merdimîye xorîn bikero. Kobanî pêroyê dinyada bîya sembolê xoverdayîşî û reya verêne cayê binkewtişê çeteyanê DAIŞ’î yo, aye ra wazenê îradeyê şarê Kobanî bişkinê.
Şarê Kobanî roja verêne yê dorpêçî ra heta ewro bêveng nêmendo helwestê xo yê xoverdayîşî dewam keno. Şar bi rayîrê komînan rojane xo bi rêxistin keno û taxe bi taxe pawitena xo keno.
Bi pêameyîşê mabênê HSD û hukmatê demkî yê 30ê çele de ame eşkerakerdene ganî 2ê sibate de dorpêç bi ameyene wedaritene. Dorpêç bi hêrişanê sîyasî û psîkolojîk şaristanê Kobanî ser o dewam keno.
