Sara Îbrahîmî ke 8ê çeleyî de Muhafizanê Şorişî yê Rejîmê Îranî aye rê îşkence kerdbi, şîyê heqîya xo. Sara Ebrahîmî rixmê resnayîşê 4 nêweşxaneyan zî înan ra yew zî dermankerdişê aye qebul nêkerdo û nêweşxaneyo 5. de ke tede ameyêne dermankerdene, şîyê heqîya xo.
Nasnameyê kesanê ke protestoyanê Îran û Rojhelatê Kurdîstanî de hetê hêzanê rejîmê Îranî ra ameyê qetilkerdene, yenê eşkerakerdene. Vîdeoyanî de ke 8ê çeleyî de ameyê girewtene la rîyê çînbîyayîşê înternetî 23ê çele de hetê çapemenî ra ameyê parekerdene, cinîya bi nameyê Sara Ebrahîmî hetê hêzanê Muhafizanê Şorişî yê Rejîmê Îranî ra aye rê îşkence yeno kerdene.
Sara Ebrahîm rîyê birînanê xo yê giran ra şîyê heqîya xo. Vîdeoyan de yeno vînayene ke demo ke Sara Ebrahîm erd de ya, endamê hêzê rejîmî bi paşkulan danêpiro, aye rê îşkence kenê û bi hacetanê tuj danê sereyê aye ro. Ame vatene ke Sara Ebrahîmî rîyê birînanê 6ê sibate ra dinyaya xo bedelnaya.
Goreyê eynî çimeyan Sara Ebrahîmî berda 4 nêweşxaneyan la yewî înan zî dermankerdişê aye qebul nêkerdo û nêweşxaneyo 5. de ameya dermankerdene û uca de dinyaya xo bedelnaya.
Rojnameger û nuştox Paksîma Mojmozî hesabê xo yê medyaya dijîtal ser o dîyar kerd ke Sara Ebrahîmî ameya qetilkerdene û wina vat: “Endamê hêzanê rejîmî Sara Ebrahîmî berd cayêko darin ke kamera înan nêvînenê û uca de bi hacetanê tuj dayo sereyê aye ro. Sara Ebrahîmî rîyê nê birînan ra dinyaya xo bedelnaye.”
