Neteweyanê Yewbîyayan eşkera kerd ke ê sucanê şerî yê ke dewanê Kobanî de vera welatijan ameyê kerdene, înan ser o cigêrayîş kenê.
Verfekê Neteweyanê Yewbîyayeyan (NY) Stephane Dûrjarrîc ke cewabê persanê rojnamegeran da, bale ante hêrişê grûbanê Hukmatê Demkî û Tirkîya yê vera kurdan ser o. Dûjarrîcî îfade kerd ke her çiqas têgêrayîşê leşkerî kemî bîyo zî krîzê merdimî xorîn beno û nêzdîyê 160 hezar kesî hema zî rewşa koçberî de yê.
Dûjarrîcî eşkera kerd ke goreyê daneyê ke yewîneyê NY’yî ra ameyê girewtene badê peymana 30ê çeleyî herêma Heleb, Hesekê û Reqa her çend kêmbîyayîşê şîdetê pêkewtişan zî hema zî koçberî nêagêrayê keyeyê xo û nê agahî dayê: “Hema 160 hezar kesî rewşa koçberî de yê. Seba resayîşê hetkarî averşîyayîş est o la çinbîyayîşê cereyanî sîstemê vilakerdişê awe vindarneno. Xetê telefonî girewtê û problemo tewr gird zî îmkanê çîyê werdî zaf kemî yê. Perwerdeyo pêroyî vinderto.” Persê “Zafêrê 70 dewê Kobanî de talan û wêrankerdişê keyeyan est o” ser o Stephane Dûjarrîc nê cewabî da: “Ma nê îdiayan ser o vindenê û rewşe taqîb kenê. Ez bawer a estbîyayîşê NY’yî herême de do hetkarîya pawitişê sivîlan bikero. Sewbîna ma tay mekanîzmayê ke sivîlî bêrê şahidîyanê xo vajê, ê zî awan kerdê.”
