Komela Edebîyatkaranê Kurd derheqê wefatê nuştox Mehmet Emîn Bozarslanî eşkerayîyêka serweşîye weşanaye û wina vat: “Keda ey do rayîrê edebîyatê Kurdkî her tim roşnî bikera.”
Nuştox û açarnayox Mehmet Emîn Bozarslan ke 1934 de qezaya Licê ya Amed de ameyo dinya û bi serran o seba ziwanê Kurdkî xebatê bêemsalî kerdê, 90 serrîya xo de şaristanê Uppsala yê Swêdî de şi heqîya xo. Komela Edebîyatkaranê Kurd bi sernameyê “Çilaya ma ya hîmdar Mihemed Emîn Bozarslan şi heqîya xo” seba serweşîye eşkerayîyêka nuştekî weşanaye.
‘O tarîtîyanê tewr sîyayan de bi bedenê roşnîye yê ziwanê Kurdkî’
Komele eşkerayîya xo de vat ke, “Bi xemgînîyêka girde ma musayê ke kedkaro pîl ê ziwan, tarîx û edebîyatê Kurdkî, nuştox û cigêrayoxo erjaye Mihemed Emîn Bozarslan surgin de şaristanê Uppsala yê Siwêdî de şîyo heqîya xo” û wina dewam kerd: “Mihemed Emîn Bozarslan tena nuştoxêk nêbi; o tarîtîyanê tewr sîyayan de bi bedenê roşnîye yê ziwanê Kurdkî. Bi xebatanê xo yê Mem û Zîna Ehmedê Xanî ser o, bi alfabeya xo ya Kurdkî, bi hîkayeyanê xo û bi cigêrayîşanê xo yê tarîxî, ey bingeyê edebîyato moderen ê Vakurê Kurdîstanî xurt kerd.”
‘Wefatê no zanyaro pîl seba heme şarê kurdî vîndîbîyayîşêko gird o’
Komele dewamê eşkerayîya xo de wina vat: “O çinarêkê zanyarî bi ke emrê xo teda û surgin reyde la bi sereberzî xizmetê şarê xo de domna. Kede û xebatê ey yê hîmanê kultur û nasnameyê kurdî ser o, seba azanê neweyan do her dem bibê rayber û çimeyêko bêemsal. Sey Komela Edebîyatkaranê Kurd ma wefatê no zanyaro pîl sey vîndîbîyayîşêko gird seba heme şarê kurdî û edebîyatê dinya vînenê. Ma sere de keyeyê ey rê, dost û embazanê ey rê û heme şaranê Kurdîstanî rê serweşîye wazenê. Keda ey do rayîrê edebîyatê Kurdkî her tim roşnî bikera.”
