Hemsereka Pêroyî yê DEM Partî Tulay Hatimogullarî dîyar kerd ke vatişê Hakan Fîdanî vera ruhê prosesî yê û vat ke ganî goreyê ruhê prosesî û averşîyayîşê aştî game bêro eştene.
Hemsereka Pêroyî yê DEM Partî Tulay Hatimogullari badê kombîyayîşî grûba xo vernîya salonê de derheqê eşkerayîyê Wezîrê Karanê Teberî Hakan Fîdan û pêvînayîşê Heyetê Îmrali Serekkomar Erdoganî de cewab da persê rojnamegeran.
‘Eşkerayîyê Hakan Fîdanî verva ruhê prosesî yê’
Hatimogullarî bale ante serê eşkerayîya Hakan Fîdanî û wina vat: “Sere de Hakan Fîdan û heme rayedarê hukmatî eşkerayîyê xo de vanê ke paweyê Sûrîye yê. La gamê ke Sûrîye de ameyê eştene û pêameyîşê peymana 30ê çele bi hawayêko micid barê prosesî sivik kerd. Ma vanê û fikirênê ke goreyê na siviki gamî bêrê eştene. Ma no hewte pawitêne ke komîsyon xebatan bilez bikero û gamanê şênber bierzê, la ma nê eşkerayîyê ke birêz Hakan Fîdanî daye xeylê bêşans vînenê. Ma eşkerayîyê ey goreyê ruhê prosesî nêvînenê. Ma pawenê ke seba ke herême de aştî aver şêro hîn zêde gamê pozîtîfî bêrê eştene.”
‘Programê heyetî de pêvînayîş est o’
Hatimogullarî cewabê persê derheqê Heyetê Îmrali û Serekkomar Tayyîp Erdogan de da û vat: “Bernameyê heyetê ma de Serekkomarî reyde pêvînayîş est o. La pêvînayîş çi wext virazîyo ne dîyar o. Eke tarîxê pêvînayîşî zelal bibo, verfekê partîya ma do agahî bido. Hema waştenêk fermî nêameyo kerdene, la waştişê pêvînayîşî est o û heme kesî naye zanê.”
