Şaristanê Kobanî 23 rojî yo dorpêçî de yo. No dorpêç xoresnayîşê awe, cereyan, sotemenî û werdî her ke şono zehmetêr keno. Nêweşxane û firinî bi îmkananê sînorkerdeyan xizmet danê û rîyê vaybîyayîşê lazimtîyanê bingeyînî ra şar zehmetîyanê girdî reyde rî bi rî yo.
Şaristanê Kobanî de lazimtîyê bingeyîn ê heyatî rîyê dorpêçê 23 rojan ra û birîyayîşê cereyanî ra şar bi hewayêko cidî tesîr de maneno. Lazimtîyê bingeyîn sere de awe, cereyan û werd çin ê.
Rîyê birîyayîşê cereyan û problemanê binawanî ra nêweşxane, firin û îstasyonê awe nêeşkenê bixebitîyê. Çar nêweşxaneyê girêdayeyê Komîteyê Weşîye yê Kantonê Firatî û di nêweşxaneyê taybetî bi temînkerdişê sotemenî û enerjî yo sînorkerde rojane hewl danê xizmet bidê.
Temînkerdişê werd û sewzîyan
Temînkerdişê fêkî û sewzîyan zî zehmet bîyo. Sewzîyê se firîngî, balîcam, îsot, xiyar û kelemî hetê bazirgananê ra bi rayîranê qaçax yenê şaaristan. Nê berhemî bi mîqdaranê sînorkerdene û bi vayîyanê vêşî resenê şarî. Sewbîna şeker, çay, birinc, belxur, nehey û mercî bi eyn hewayî bi rayîranê qeçax yenê vînayene.
Her ke şono cuye zehmetêr bena
Kobanî rîyê dorpêço ke 23 rojî yo dewam keno, krîzêkê cidî de yo. Şar seba resayîşê lazimtîyanê bingeyin zehmetîyan anceno. Bi taybetî nêweşxane û firinî bi kapasîteya sînorkerda xebitîyenê. Na rewşe tesîrêko cidî şert û mercanê cuye yê şaristanî ser o kena.
Cehdê temînkerdişê cereyanî
Komîteyê Enerjî yê Kantonê Firatî û rayberîyê herêmî yê eleqedar seba temîrkerdişê binawanîya cereyanî kewtê mîyanê cehdan. Xetê elektrîkî ke rîyê hêrişanê çeteyanê HTŞ’yî ra zerar dîbî, ameyê temîrkerdene. Erjeno merdim vajo ke cayo ke çeteyê HTŞ’yî est bîyê cereyan est bi la şaristanê Kobanî û dewanê girêdayeyê ci de bi temamî amebi birnayene. Dimayê cehdanê gir perey şewe cereyanê şaristan û dewanê Kobanî virazîya.
