Dewleta tirkan ke goreyê Peymana 29ê Çeleyî ganî hêzanê xo yê leşkerî û sîvîlî Serêkanîyeya îşxalkerde ra bivejo, êdî dayo kayanê neweyan dima. Çimeyêkê şaristanî vat ke îstîxbaratê tirkan bi grûbanê girêdayeyê xo reyde kombîyayîş kerdo û înan ra waşto ke çiqas zor înan ser o bibo zî wa şaristanî ra nêvejîyê.
Goreyê Peymana 29ê Çeleyî ke mabênê Îdareyê Xoser û Hukmatê Demkî de ameya îmzakerdene, ganî heme hêzê xerîbî ke şaristananê kurdan de yê, ê cayan ra bivejîyê, koçberî agêrê û bi beşdarîya kurdan îdareyê sîvîlî bêrê awankerdene. La 10 rojî vîyartî û dewleta tirkan hema cayanê ke îşxal kerdê, ê cayan ra nêvejîyaya.
Hêzê tirkan hema cayê xo de yê, çeteyî bifikar ê
Welatijêkê Serêkanîye ke sebebanê ewleyî ra nêwaşt ke nameyê ci bêro nuştene, vat ke badê peymane hema zî leşker, îstîxbarat û wezîfedarê sîvîlê tirkî sazgehanê şaristanî rayra benê û tu vurnayîş çin o. Grûbê çeteyan derheqê ameyoxê xo de kewtî fikaran û nê fikarî benê hêrsêkê hemverê dewleta tirkan.
Çeteyan reyde kombîyayîş ameyo kerdene
Çimeyî vat ke reaksîyonanê çeteyan ra pey îstîxbaratê tirkan çend rojî ra ver serçeteyan reyde kombîyayîşêk kerdo û nê agahî dayê: “Kombîyayîşî de rewşa agêrayîşê welatijanê Serêkanîye û fikarê çeteyan ameyî qiseykerdene. Dewleta tirkan çeteyan ra vat ke beno ke seba ke ê Serêkanîye ra vejîyê înan ser o teda bêra kerdene û waşto ke rixmê heme tedayan zî mevejîyê û mendişî de israr bikerê.”
Çimêyî vat ke Tirkîya wazena ke meseleyê Serêkanîye derg bikera û nê çîyî vatê: “Îstîxbaratê tirkan wazeno ke çeteyanê xo û keyeyanê înan tîya de verda û awankerdişê îdareyo newe bêmana bikera. Seba ke Serêkanîye û Girê Spî sey bendêk mabênê Kantona Cizîr û Firatî de vînena, o semed ra wazena ke koçberî bi taybetî şarê kurdî na mesele her tim rojev de bitepişê.”
Heyetêkê Koçberanê Serêkanîyê kewtê mîyanê têgêrî
Heyetêkê Komîteyê Koçberanê Serêkanîye 10ê sibate de Walîyê Hesekê Nûredîn Îsa Ehmedî zîyaret kerd. Walîyî vat ke dewaya agêrayîşê koçberanê Serêkanîye dewaya sereke ra yew a û ê rayîrê agêrayîşê ewle ser o xebitîyenê. Goreyê Qanûnê Îdarî yê Sûrîye, wezîfedarê qeza û şaristanokê hetê walîyî ra yenê tayînkerdene û ganî Walîyê new rojê ke yenê de game berzo la seba ke Tirkîya îşxalî de israr kena û Hukmatê Demkî bêveng maneno, no proses derg rameno.
