Komela Şêx Seîdî bi muansebetê serrgêra 101. ya destpêkerdişê serewedaritişê Şêx Seîdî eşkerayî daye. Sekreterê Pêroyî yê Komele Mordem Zelî vat ke prosesê “rîbirîameyîşî” berpirsîyarîyêka tarîxî ya û waşt ke cayê gorê Şêx Seîdî û embazanê ci bêro eşkerakerdene.
Komela Kultur, Perwerde û Piştîpêdayîşî ya Şêx Seîdî awahîya xo ya Amedî de kombîyayîşê çapemenîye kerd.
‘Ma bi înkar nêqedîyenê’
Serekê Komele Kasim Firatî qisey kerd û vat: “Kurd û Kurdîstan heme sîyaset û kesayetan ra girsêr ê. Kurdî vizêrî est bî, ewro est ê û do heta peynî zî bibê. Ma îqtîdarî ra vanê, şima bi nê hewayî nêeşkenê kurdan biqedênê. Bêrê goreyê huqûqê mîyanneteweyî ma nas bikerê, heqanê ma rê hurmet bikerê. Ma bi înkar nêqedênê.”
Prosesê serewedaritişî
Sekreterê Pêroyî yê Komele Mordem Zelî metnê eşkerayî wend û wina vat: “Tam 101 serrî ra ver, 13ê sibata 1925î de qezaya Pîran de hedîseyêk qewimîya û netîceyê hedîse de Şêx Seîd û embazê ci ameyî girewtene. 29ê hezîrana 1925î de ameyî dardekerdene. Hedîseyê 1925î tarîxê Komara Tirkîya de yew cayê şikitiş ê tewr muhîman ra yew yeno qebulkerdene.”
Zelî vat ke çi heyf ke sîyasetê rijnayîş, înkar û asîmîlasyonî roja ewroyêne de zî dewam keno û wina domna: “Seba ke no prosesî saxlem bêro erjnayene ganî belge û arşîvê ke tomarê dadwerîye, arşîvê Meclîsî û heme belgeyanê fermîyan de est ê, seba tarîxnasan, huqûqnasan û cigêrayoxan bi temamî bêrê akerdene.”
Zelî vat ke rîbirîameyîşê Tirkîya tarîxê xo de û erjnayîşê hedîseyanê vîyarteyan bi perspektîfêko zafhetî, lazimtîya bingeyîne ya gêrayîşê aştî û komelê demokratîkî yo û wina vat: “Ma bawer kenê ke prosesê ‘efûkerdişî’ û ‘rîbirîameyîşî’ berpirsîyarîyêka tarîxî ya. Her wina ma waştişê xo yê seba dîyarkerdiş û vilakerdişê cayê gorê Şêx Seîd û embazanê ci newe kenê. No waştiş hem lazimtîya erjê merdimîye û wîjdanî ya hem zî awankerdişê aştîya komelkî de gamêka bi erj a.”
