Aynur Ayşîn ke serra 1994î de pîyê xo vindî kerdo, 29 serrî yo ke pîyê xo gêrena. Ayşîn vana: “Hende zorê mi şono ke wexto ke yew mi ra vano ‘pîyê to yo rehmetî’ çunke hema zî mezelê pîyê mi çin o.”
Veşnayîşê dewan ra ver bi înkarkerdişî
Goreyê Aynur Ayşîn pîyê aye Mehmet Can Ayşîn merdimêko rind bîyo. Karê xo û keyeyê xo reyde xejilîyayêne. 1994î de wexto ke dewa înan veşnaya, hukmatî pîyê aye girewto berdo û a roje ra pey kênaya ey Aynur û keyeyê înan gêrenê ci. Aynur wina vana;
“Dewijî antî pêser û dewe veşnaye. Dima camêrdî berdî Tutîyan, tayê înan veradayî tayê înan berdî. 9-10 hebî merdimî ardî Licê. O wext YÎBOyê Licê kerdbî karakol. Êyê ke ardî uca, vajîya ke ma do îfadeyanê înan bigîrê. La pîyê mi nêverda. Hende zorê mi şono ke wexto ke yew mi ra vano ‘pîyê to yo rehmetî’ çunke hema zî mezelê pîyê mi çin o.”
‘Şahidê ma est ê la hukmat înkar keno’
Goreyê vaytişanê Ayşîn şahidê înan ke a game tepişîyayê, şahidîye kerda ke Mehmet Can Ayşîn înan reyde ameyo girewtiş. La hukmat hem verê de hem zî ewro înkar keno. Aynur vana “10 kesî ke ey reyde ameyê destbendkerdene ameyê şahîdîye kerda, înan vato ‘No însan ma reyde bi. Şima o ma reyde girewt.’ La hukmat reyna zî înkar keno.”
‘Heta ke dilopêk gonî mi de biba ez do nêvindera’
Keyeyê Ayşîn bi serran o ke heme cayê hukmatî de pîyê xo gêrenê. Enqera ra bigêre heta Îstanbulî û Mehkemaya Heqanê Merdiman ê Ewropayî (AÎHM) şîyê. Aynur bi qerardarîye vana “Ez heta ke weş ba na dewa dima şona. Mi waştêne ez ey bi ganî bivîna la êdî seba ke esteyanê/kateyanê ey bivîna ez fek na dewa ra nêverdana.”
‘Wa êdî mayî nêbermê’
Aynur ke 29 serrî yo adaletî gêrena, vana ke êdî bes o û wazena aştî bêro. “Ma êdî nêwazenê ne mayê eskeran ne zî mayê gerîllayan bibermê. Wa her di hetî zî aştî virazê. Muxatabê çareserîye Erdogan û Rayberê PKK’yî Abdullah Ocalan o. Wa pîya çareserîye bivînê.”
