Na asme, asma Gûcîg a. Qomê ma na asma Xizirî de kam ke tengîye de mendo, rindîye û aştîye ser mînet kenê. Dervîş Cemel ra Pîr Zeynel Ornek, na asma Xizirî de seveta qomê Rojava mînet keno û wina vano: “Xizir sare Rojava de hazir û nazir o.”
Zeynel Ornek, Ocaxe Dervîş Cemal ra yo. Dêrsim Pulur de weşîya xo ramneno. Na asma Gûcîge, sare elewîyan de mûhîm a, na asme de Xizir Xelasî yo. Qomê ma nîyaz pozeno, veng danê cîranan sone jîyaran ser. Rindîye ser veng dane Xizir. Zeynel Ornek, asma Xizir Xelasî de ajansê ma re Rojava ser o qisey kerd.
‘Venge kurmancan dîna heşîya’
Zeynel Ornek, verî Surîye ser qisey keno û wina vano: “Sûrîye de Esat zaf zûlêmkar bî. Esat şî, tepa sare kurmanc eve destê xo raye xo kerd ya. DAIŞ zereyê Sûrîye de xeylê kesî kîştê. Sare kurmancî, DAIŞ’î welate xo ra kerd teber. Xoserîya xo girewt. Rojava de, teyna sare kurmanc nê ereb, suryan, armenî, perûne pîya vate ke, ma çûtûr weşîye xo ramneme. Perûne pîya ame jû ca, sîstemêko newe viraşt. Nameyê kurmancan dîna heşîye. Vatene Dewlete tirkan, sare Rojava bîndestîye de bimano. Çira hînî keno, sîndore xo de sare kurmanc zaf o. No ci rê rind nîame. Dûwele pîlû, Rojheleto Mîyanên wazenê ke bîjere hete kurmanc, raye raştîye der ê, heqe xo cenê, perûne bizano ke, kurmancî aştî ser o pêro dane.”
‘Kurmancî vejîya raştîye’
Zeynel Ornek, qiseykerdîşe xo de vano ke:“Ma dîrege zerya xo de, sere linganê xo de vîndeme. Nika kurmanc vejiya raştîye. Hete Tirkiya de, vame aştî bera. Dewlete tirkan rê zaf înan nêkeno. Ma Dewlete tirkan de zaf dî. 38î ra dî, 1980î ra dî, 1994î ra dî, qey bes nêbeno. Nê wextî de, perûne be zone xo, be îtîqate xo, be kulture xo raye xo biramo. Dîna HTŞ naskerdî, hete ma nas kerdî. Ma çînay wazenîme, ê çinay wazenê, kamcîye raye raşt a, dîna dî. Derdê zalîmî feqir û fîqara nîyo. Dûele girs, wazenê ke deste xo pir bikerê. Derde înû rindîye nîya. Nare tepa deste jûmîn bîjerîme. Hîn bîkerîme ke raver şerîme. Ma xeylê dîyayîme, nika vînemîme ke, çar dûgelen de kurmancî ameyê peser. Nîye ra zaf bîme sa. Kurmancî, 80 serrî yo ke xona yenê jûmînî. “
‘Xizir leyê qome mader o’
Zeynel Ornek, qome xo rê mînete keno û hînî vano: “Xizir ra mînetemî, Xizir ke hazîr û nazir o, Xizir ke sere gelîyesan de, sere Denîzan de hazîr û nazir o, qome ma Sûrîya de tengîye der o, Kurmanc, elewî û dûrzî, ereb û suryanan rê hazir û nazir bo. Neqî cîre dûr bero. Aştî bîyaro. Zalîm û arsîzû dûr şêro.”
