Platformê Pawitiş û Paştîdayîşê Şaristanî yê Amedî bi eşkerayîyêk dîyar kerd ke erşawitişê hetkarîyanê seba Kobanî rastê xeylê astengîyan ameyê û waşt ke seba ke amadekarîyê neweyî biresê Kobanî berê Mûrşîtpinarî bilez bêro akerdene.
Platformê Pawitiş û Paştîdayîşî Şaristanî yê Amedî derheqê TIRanê hetkarî yê seba Kobanî amebî amadekerdene, Salona Kombîyayîşan ê Odaya Bazirganî û Endustrî ya Amedî (DTSO) de eşkerayî daye. Sereka Komela Rosa Zeynep Sîpçîk dîyar kerd ke korîdorê astengîyan vernîya hetkarîyanê merdimî de ameyo awankerdene.
‘Pirsûs ra heta Çobanbeyî Ambargo’
Zeynep Sipçik dîyar kerd ke vera heme hewldananê dîplomatîk, Berê Murşitpinarî bi hawayêko kêfî nîno akerdene û wina vat: “30ê Çele de 25 TIR’ê ma ver bi Pirsûsî kewtî rayîr, la bi bahaneyê ewleyî rayîr înan ame girewtene. Nê TIR’î hîrê rojî binê varan û serdî de ameyê vindarnayene. Badê zextanê girdan ma mecbûr mendî ke rayîrê xo ver bi Kîlîs-Çobanbeyî ra bivurnê. Na tena vurnayîşê rayîrêk bî, No hewldanêke bî ke hetkarîya ma bidê grûbanê çekdar yê Hukmatê Demki ya Şamî bikerê. La ma naye qebûl nêkerd.”
‘Qesta astengîyan vejenê’
Amancê vetîşê astengîyan ser o Zeynep Sîpçîk bale ante zehmetîya muzakereyan û astengîyanê zereyê Sûrîya ser o û dîyar kerd ke tena bi şertê embazîya heyetê înan û AFAD’î TIR’î kewtê rayîr. Zeynep Sîpçîk wina vat: “Nê prosesî de muzakereyî ameyê kerdene ke koordînasyonê AFAD’î reyde hetkarî bêra kerdene û bi şertê heyetêke platformê ma ra heta Kobanî TIR’an reyde şoro. Heyetê ma ke destpêkê kampanya ra bi sazgehanê pêroyî yê eleqedar ra mîyanê têkilî de bî, netîceyê pêvînayîşan de agahî girewte ke bi qebulkerdişê şertanê ke ma cor de îzah kerdî, eşkenê hetkarî şêrê Berê Kîlîs-Çobanbeyî ra bêrê erşawitene. Platformê ma naye ser waşt ke ganî hetkarîya ciwîyayîşî û bilez bê tu zelalî û ereymendene rasterast bireso destê hewcedaran.”
‘Ganî hetkarî însafê Hukmatê Demkî re nêro verdayene’
Derheqê erşawitişê TIR’an de Zeynep Sîpçîk eşkera kerd ke netîceyê pêvînayîşan de, bi koordînasyonê AFAD’î û bi amadebîyayîşê heyetê înan TIR’ê hetkarî 10ê sibate de serê Berê Sînor ê Kîlîs-Çobanbeyî ra resayê Kobanî û wina dewam kerd: “Eynî roje de hetkarî resa kesanê hewcedaran. La prosesê derbasbîyene de Çobanbeyî ra heta Kobanî hetê tayê yewîneyê girêdayê Hukmatê Demkî yê Şamî ra ambargo û astengîyê cîyayî ameyê kerdene. Nê problemî bi koordînasyonê AFAD’î ameyê derbaskerdene. Na rewşe reyna mojna ke ganî hetkarîya merdimî însafê Hukmatê Demkî yê Sûrîya nêro verdayene.”
‘Pitik û nêweşê qanserî binê rîskî de yê’
Zeynep Sîpçîk dîyar kerd ke Kobanî de gede û kesê nêweşê qanserîyê nêresenê dermanan û îmkanê weşîye û wina vat: hûmarêke zêde yê pitikan kuvezan de têkoşînê cuye danê. Xeylê welatijî nêweşê dîyalîz û qanserî binê rîskê cuye de yê, û kemasîya dermanan û aletê teknîkî resayê astêke talûkeyin.”
‘Hetkarî hedre ya beran akerê’
Dewamê eşkerayî de Zeynep Sîpçîk dîyar kerd ke 20 TIRê hetkarî hedre ya û sipasîya xo kes û sazgehê ke paştîdayena hetkarî kerda û wina vat: “Depoyê ma de 20 TIRê bînî yê pirî derman û gida hedreyê. Ma nê wazenê na hetkarî bi rayîranê dûrî û bi talûke bierşawê. Berayê Murşitpinarî ke 10 deqa dûrî Kobanî yo, ganî bilez bêro akerdene. Qampanya bi qerardarî dewam kena û her roje gird bena. Ma spasîya şarê xo yê ke nê prosesî de paştîdayene mojna, Sazgeh û dezgehê ke paştî da, rayberê herêmî û her kesê ke keda înan est a kenê. Ma vengdayîşê heme sazgehan û welatijan kenê ke paştîdayena xo xurt bikerê û paştî bidê kampanyaya ma.”
