Ziwanhes Farûq Cîlasûn vîr vist ke Têgêrayîşê Azadîye eynî wextî de pawitişê ziwanê kurdkî kerdo, ziwanî aver berdo û vat: “Tarîxê ma zî, ziwanê ma zî bi xeyrê têgêrayîşî ame ewro. Verê zî tayê têgêrayîşî est bî la bes nêbî. Xebatê dergûdilayî nêameyê kerdene.
Hetê UNESCO ra serra 1999î de 21ê sibate sey Roja Ziwanê Dayîkê ya Dinya ame îlankerdene. Şarê kurdî sey her serre emser zî amadekarîya 21ê sibate keno. Semedêko Vakurê Kurdîstan û Tirkîya de bi taybetî ziwanê kurdkî û xeylê ziwanî bînî yenê astengkerdene û qedexe yê. Welatijî ne eşkenê bi ziwanê xo yê dayîke perwerde bivînê ne zî xizmet bigîrê. Şarê kurdî nêeşkeno meclîs de, sazgehanê pêroyî de, warê xizmet û perwerdeyî de bi kar bîyaro, bi serran o seba ziwanê kurdkî bibo ziwanê fermî têkoşîn dano. Kurdî ke nêeşkenê bi ziwanê xo xizmet bigîrê problem û zehmetîyan reyde rî bi rî manenê, wazenê bi ziwanê xo perwerdeyî bivînê.
Ronayoxanê Merkezê Kultur û Hunerî yê Mem û Zîn ra yew ke girêdayê Merkezê Kulturî yê Mezopotamya (MKM) Cizîrî ke 2004î de ame ronayene û aktîvîstê Têgêrayîşê Ziwan û Perwerdeyî yê Kurdkî (TZP Kurdkî) yê verê Farûq Cîlasûn bale ante astengîya ziwanî ser o û vîr vist ke Têgêrayîşê Azadîye kulturêko newe afirna, ziwanê kurdkî her wext pawit û bi saya nê têkoşînî ziwanê kurdkî gandar mendo.
‘Sazgehê ma muhîmî bidê ziwan do şarê ma kêfweş bibo’
Farûq Cîlasûnî îfade kerd ke vîndîkerdişê ziwanî vîrrakerdişê ziwanî reyde girêdaye yo û vat: “Keye de ganî gedeyan reyde Kurdkî bêro qiseykerdene, sîyasetmedarî bi Kurdkî qisey bikerê û ganî xebata xo mîyanê şarî de bi kurdkî bikerê. Sîstem ewro vîrrakerdişê ziwanî ma ser o ferz keno. Bi hezar serran o sîstemî nêverdayo şarê ma ziwanê xo aver bero. Sazgehê ma muhîmîya ziwanê kurdkî bidê vernî do şarê ma kêfweş bibo. Nê çîyî hema nêbîyê.”
Farûq Cîlasûnî muhîmîya Têgêrayîşê Azadîye ya ziwanê kurdkî ser o vîr vîst û wina vat: “Nê serranê peyênan de mîyanê şarî de kulturêko xurt afirna. Nê têgêrayîşî no ziwan newe ra gandar kerd. Tarîxî ma zî ziwanê ma zî bi xeyrê nê têgêrayîşî ame heta nê rojan. Ehmedê Xanî û xeylê kesanê bînan xebate kerde. Mem û Zîn ke bi kurdkî biameyêne nuştene beno ke dinya de zaf reyan Xelatê Nobelî bigirewtêne. Hetê edebîyat û heskerdişî de hema zî eserêk sey Mem û Zîn nêameyo nuştene.
‘Ganî keyeyî gureyê xo bi ca bîyarê’
Farûq Cîlasûnî vengda heme kesan ke ziwanê xo rê wayîr vejîyê û wina vat: “Vengdayîşê mi şarê ma rê no yo ke gedeyanê xo bi ruhê kurdayetî pîl bikerê û înan reyde bi Kurdkî qisey bikerê. Her çiqas şêrê dibistanê sîstemî zî ganî zereyê keyeyê xo de teqez bi Kurdkî qisey bikerê. Kitabê mûsnayîşî bidê înan, çekûyanê Kurdkî bi înan bidê mûsnayene. Ganî keyeyî gureyê xo bi ca bîyarê. Ez hêvî kena ke heme xebatkarê ma yê sazgehan ke Kurdkîya xo rast bikerê û heme xebata xo bi Kurdkî rayra bêrê. Ganî roşnvîrê ma, zanayeyê ma, pêşengê ma verê bi Kurdkî qisey bikerê û cuya xo bi kurdayetî dewam bikerê. Ganî ziwanê Kurdkî bibo ziwanê zanistî û ziwanê perwerdeyî, ma bi ziwanê rojanê qisey kenê no bes nîyo. Rayberîyê Herêmî eşkenê taybetîyêka girde bidê nê karî. Ziwanê ma estbîyayîşê ma yo. Her şaredarî ganî meseleya ziwanî seba xo ferz bivîno. Prosesê Aştî û Komelê Demokratîk ser o Komîsyonê Meclisî do rapor amede bikero. Eke rapor de qebulkerdişê ziwanê Kurdkî çin bo tu maneyê nê raporî nêmaneno. Dayîkê aştî şîyê kombîyayîşê komîsyonî la nêverda bi Kurdkî qisey bikerê, qedexe kerd. Ganî ma baş nê komîsyonî ra vajê ziwanê Kurdkî xeta ma ya sûr a.”
