Serekê Meclîsî Numan Kurtulmuş ke akerdişê kombîyayîşê 21. yê Komîsyonê Meclisî de qisey kerd, dîyar kerd ke raporo hemparî ê komîsyonî do 7 madeyan ra bêro pê û vat: “Xurtkerdişê huqûqî û sîyasetêko demokratîk eşkeno wayûbiratî û yewîya ma xurt bikero.”
Kombîyayîşê 21. ê kombîyayîşê peyên ê Komîsyonê Meclîsî yeno viraştene. Komîsyon bi serekîya Numan Kurtulmuş bi rojevê raporo hempar kom bi. Verê ke kombîyayîş dest pêbikero, Serekê Meclisî Numan Kurtulmuşî îfade kerd ke rapor goreyê kombîyayîşanê goşdarîkerdişê sazgehan de waştişê ke vejîyayê vernî, pêşnîyarê partîyanê sîyasî û goreyê prosesî madeyî ca girewtê
Numan Kurtulşmuşî dîyar kerd ke ê serdemêko tarîxî ra derbas benê û wina vat: “Raporê ma 7 madeyan ra yeno pê. Xebatê komîsyonî, amancê sereke yê komîsyonî, wayûbiratîya kurd û tirkan a tarîxî û huqûqê wayûbiratî, pêşnîyarê ke kombîyayîşanê komîsyonî de ameyê kerdene, rapor nînan ser o yo. Xofesihkerdişê PKK’yî û veradayîşê çekan, pêşnîyarê qanûnî seba prosesî, pêşnîyarê seba demokratîkbîyayîş û netîceyî ameyê erjnayene. Sewbîna 5 madeyê eleqedarî zî est ê. Nê kombîyayîşê peyênî de erjnayîşê ke endamê komîsyonî do bikerê, uca de ca bigîrê. Hêzê emperyalîstî bi cîyakerdişê netewan û bawerîyan wazenê cografyaya ma perçe bikerê. Vera ney ma do wayûbiratîya xo xurt bikerê. Çareserkerdişê problemanê terorî tena bi polîtîkayanê asayîşî nêgînê dest û hetê sîyasî û heme hetan ra ganî ser o bêro vindarnayene. No problem bi ezberanê cîyakarî nê bi zîhnîyetêko samîmî û awanker eşkeno çareserîyêka domdare aver bêro. Xurtkerdişê huqûqî û sîyasetêko demokratîk eşkeno wayûbiratî û yewîye xurt bikero. Raporo hempar çarçeweyê heme pêşnîyaranê partîyanê sîyasî de bi pêameyîş viraşto. Gureyê komîsyonî no yo ke heme welatijanê ma xo seypê bivînê.”
