DEM Partî fikrê xo yê cîya-cîya ê derheqê Pêşnîyaznameyê Raporê Hemparî de ke xebatanê komîsyonê meclîsî de hazir bîyo, raya pêroyî reyde pare kerd. Partî bi taybetî tayê konsept û pênaseyanê raporî rê îtîraz kerd.
Eşkerayî de îmzaya endamanê komîsyonî yê DEM Partî Gulîstan Kiliç Koçyîgît, Meral Daniş Beştaş, Hakki Saruhan Oluç, Celal Firat û Cengîz Çîçekî est a.
DEM Partî vat ke vatişanê “Prosesê Tirkîyaya bêterore”, “rêxistina terorî” ûsn. ke pêşnîyaznameyî de ca girewtê, hemfikir nîyê. Partî vat ke ê nê prosesî bi referansê vengdayîşê Rayberê Şarê Kurdî Abdullah Ocalanî yê 27ê sibate 2025î sey “Prosesê Aştî û Komelê Demokratîkî” pênase kenê.
DEM Partî vat ke meseleya kurdan bi konseptê “teror” nêyena vatene û na meselaya winasîn a ke heq û azadîyan a ke hetê aye yê sîyasî, komelkî, kulturelî û tarîxî est ê. Demêko ke yeno waştene pêkewtişê çekdarî bêrê vindarnayene, şuxulnayîşê konseptê yewhetan aştîya komelkî reyde yewbînan nêgêno.
DEM Partî îfade kerd ke Rayberê Şarê Kurdî Abdullah Ocalan aktoro muhîm ê nê prosesî ra yew o û ziwano ke raporî de seba ey şuxulîyayo ruhê prosesî reyde yewbîna nêgêno û vat: “Pênasekerdişê Birêz Ocalanî û têkoşînê ey pêşnîyazname de bi konseptê sey ‘teror’ û ‘rêxistina terorî’, ma hewcedarî û huqûqê prosesî de raşt nêvînenê.”
Partî eynî wext de bale ante ser ke heqê ziwanê dayîke mabênê heqanê bingeyînan de yo ke bi bîyayîşî ra yeno û vat ke qedexeyê ke Kurdkî û ziwananê bînan ser o yê ganî bêrê wedarnayene û zafziwanîye bêra qebulkerdene.
DEM Partî peynîya eşkerayîya xo de vat: “Ziwanê Raporê Hemparî ganî yewhet nêbo. Konseptê ke zaf beşan de tesîrê travmatîk ê cîya cîyayan virazeno, ganî reyna bêrê erjnayene. Aştî tena netîce nîya; eynî wext de metod û ziwanê bi xo ya zî.”
