Hemserek û îdarekaranê sazgehê kultur û ziwanî yê Îzmîrî vat ke demokrasî bi naskerdişê heqanê kurdan mumkun a û ganî 21ê Sibate bibo warê têkoşînêkê xurtî û êdî wext wextê mektebanê kurdkî yo.
Hemserekê Komela Ziwanî ya Avesta Remezan Kaygisizî vat ke şarê kurdî wazeno heqê ke şarê bînan de est ê, yê înan zî bibê û vat: “Heta ke ziwanê ma nêbo ziwanê fermî û yê perwerdeyî dejê ma do dewam bikero. Ganî tepîşteyê sîyasîyî û Birêz Ocalan heqê hêvîye ra îstîfade bikerê.”
‘Ganî ma 21ê Sibate bikerê warê têkoşînî’
Îdarekaranê Komela Cigêrayîş, Kultur, Edebîyat, Ziwan û Tarîxê Kurdan ra Mahmut Alpşenî vat ke ganî 21ê Sibate bibo warê têkoşînî û vat: “Ganî ma qîmetê xo tena bi dersêka weçîneye nêvînê. Heta ke ma heqê xo yê bingeyî temam nêgîrê xo dest, ganî her keyeyê xo bikerê mektebêk.”
‘Hewcedarî bi mektebanê kurdkî est a’
Hemserekê Komela Dêrsimijan Hasan Elî Kiliçî vat: “Hewcedarîya ma bi mekteban est a ke perwerdeyê xo bi ziwanê dayike bidê. Kirmanckî (zazakî) nika binê talûkeyê vindîbîyayîşî de ya. Eke wina dewam bikero asîmîlasyon do hîna xorîn bibo.”
