Mehmed Mehdî Ataca ke 31 serran ra dima Hepisxaneyê Şakranî ra tehlîye bî, vat ke do rayîrê ke Rayberê Şarê Kurdî Abdullah Ocalanî ra dewam bikerê ke rayîr şêrê.
Ataca ke serra 1995î de Edene de ameybî tepîştene, Dadgeha Emnîyetê Dewlete (DGM) ya Amedî de bi îddîayê “xirabkerdişê yewîye û yewparîya dewlete” cezaya muebedî girewtbî. Ataca hepisxanayanê Êlih, Amed, Yozgat, Îskenderun, Edene, Mersîn, Sêrt û peynî de Îzmîr de mend.
Ataca ke azadkerdişê ey yew rey ameybî taloqkerdene, vernîya hepisxaneyî de hetê keye, merdim û îdarekaranê sazgehan ra bi coşêko gird ame pêşwazîkerdene.
Atacayî vat: “35 serrî yo ke şarê ma wayîrê ma vejîya. Ma deyndarê şarê xo yê ke nanê xo da ma û keyeyê xo kerdî stargeh. Mi 31 serran zehmetîyanê şarê xo rê xîyanet nêkerd. Ez ewro bi sereberzîye vejîyena.”
Atacayî peynî de bale ante prosesê Haştîye û Komelê Demokratîkî ser o û vat: “Prosesêk yeno averberdene; ma do teber ra zî seba ke no proses ver bi weşîye şêro, hetê Birêz Ocalanî de cayê xo bigîrê. Seba ke êdî domanê kurd û tirkan nêmirê, destê ma ra çi bêro ma do bikerê. Ma hetkarê haştîya raştikêne û heqîqî yê. Şehîdanê nê prosesî ra yew zî embazê ma Sirri Sureyya yo; ez ey zî bi hurmet yad kena.”
