Zafê pisporanê heqanê merdiman ê Neteweyê Yewbîyayeyan (NY) bi beyanatêk veng da Îranî ke çalakkerê cinîyan ser o zextanê xo bivindarna.
Zafê pisporanê heqanê merdiman ê NY’yî derheqê tesdîqbîyayîşê cezaya dardekerdişê mahkuma sîyasî ya kurd Pexşan Ezîzî de beyanat da. Beyanat de ame waştene ke cezaya dardekerdişî ya ke ci rê ameya birnayene ca de bêra betalkerdiş. Reyna ame waştene ke derheqê îşkence û bêdadîyan de tehqîqat bêro kerdene û dest zextê ke çalakkeranê cinîyan ser o yeno kerdene ra bêro antene.
Beyanat de ame vatene ke Pexşan Ezîzî seba ke bi derbê zorî îtîraf bikera, îşkenceya psîkolojîk û fîzîkî ra derbaz bîya û demêko derg nêverdayo ke parêzer û keyeyê xo reyde pêvînayîş bikera. Û seba ke bi zorî îtîraf bikera, zafê endamê keyeyê aye ameyê destbendkerdiş.
Peynî de zî ame dîyarkerdiş ke cezaya ke Pexşan Ezîzî rê ameya birnayene, sewîyeya berze ya zextî ya û waştişê bêvengkerdişê cinîyan nîşan dana.
