Ziwanzan û nuştoxê kurdî Sadiq Varlîyî ard vîrî ke raporê Komîsyonê Meclîsî de heqê perwerdeyê bi kurdkî bi hewayêko zelal ca nêgirewto û na sey kêmanîyêka girde pênase kerd. Varlîyî vat: “Seba girewtişê heqê perwerdeyê bi ziwanê dayike ganî ma waran ra bibê. Eke ma wina nêkerê kes heqê ma nêdano ma.”
Varlîyî vat ke raporê hemparî de nênîşandayîşê heqê perwerdeyê bi ziwanê dayike kêmanîyêka gird a û vat: “Demê ronayîşê Komare de şarê kurdî zî piştî daye. Sere de naskerdiş û sozê xoserîye ameyî dayene la badê ronayîşê Komare şarê kurdî, welatê kurdan û ziwanê kurdî çin hesibnîya û komkiştişê girdî bîyî. Ganî komîsyonî heqê perwerdeyê bi kurdkî ca bidayêne. Ganî verdibistanan ra heta unîversîteyan bi kurdkî perwerde bêro dayene. Eke perwerde nêbo ziwan mîyanê wextî de xirab beno.”
“Têkoşîn nêbo kes heqê ma nêdano ma”
Varlîyî vat: “Eke ma sey sazgehanê ziwanî, partîyê sîyasî û şarî waştişê xo bi îsrar nêkerê û têkoşîn nêkerê kes heqê ma nêdano ma. Ganî ma bi hêzêko zaf xurt waran ra vengê xo berz bikerê û sîyasetmedarê ma zî heqê ma Meclîsî de bipawê.”
“Ganî şar, sîyaset û sazgehî wayîrê ziwanî bivejîyê”
Varlîyî bale ante halê şuxulnayîşê kurdkî yê Vakurê Kurdîstanî ser o û vat: “Verê dewlete bi zordestîye komel asîmîle kerdêne la nêeşkîyaye serkewte biba. Bi taybetî badê ke her keye de televîzyon bi ca bî şuxulnayîşê tirkî hîna zafêr bî. Nika êdî hewce nêmendo ke dewlete bi zordestîye komelî asîmîle bikero — komel xo bi xo asîmîle beno. Wexto ke ma doman bîyê ma çend tirkî zanayêne zî ma şerm kerdêne ke bi tirkî qisey bikerê. La nika keyeyî êdî bi domananê xo reyde kurdkî qisey nêkenê.”
Varlîyî dîyar kerd ke wezîfeyo tewr gird sîyasetê kurdan ser o yo çunke sîyaset ewro pêşengîya komelî keno û coka ganî warê sîyasetî de ziwan bibo kurdkî û vat: “Ganî şar, sîyaset û heme sazgehê ma wayîrê ziwanî bivejîyê û têkoşînê hemparî aver berê.”
