Mehmed Talayî heta serra 1994î weşîya xo Dewa Bor de ramita. 94 de verê zulmê dewlete ra bar keno yeno Gazika Dêrsimî, weşîya xo îtade ramneno. Qaytê malê hûrdîyî keno. Hesreta dewa xo anceno û vano: “Dewe de bon nemendo, dar û ber nêmendo, teyr nêmendo.”
Mehmed Talay nika weşîye xo taxa Dêrsimî Gazîke de ramneno. Wexto ke dewlete 94î de dest bi talkerdene û vesnayena dewan kerd înan zî dewa xo Bor ra bar kerd ameyî zereyê Mamekîye. Dewa xo de malê xo zaf bîyo, hal û mezatê xo rind bîyo, ewe serbestîye dewa xo de karê xo kerdo. Nika çend pesê xo yê hurdî est ê. Îta de zerê sûke de, dormê bîna û kemerî de biz û meşinanê xo çîrayneno.
Memed Talayî, verende dewa xo çutur bîya û nika çi kar keno ser ajansê ma rê qisey kerd.
‘Dewa ma zelal û delal bîye’
Memed Talay verênde dewa xo ser qisey keno û wina vano: “Ma dewa xo de mal kerdêne weyî, velg ardêne, derze ardêne, koçên birnêne, mal berdêne koçên ser. Mal worede nevejîyêne heşt rojî. Nika mal çîn o, bese nêkenîme. Kes nêmendo. No kar zaf girano. Zibil est o, koçênê ney, ardene, berdene, rûtene, şîyayena ney est a, woderdayena ney est a, zaf girana. Dewlete ma dewa xo ra vetîme, dewa ma zê cenet bîye. Ma ameyme Mamekîye, îtade bîme rejîl. Sûke marê rind nîyamê.”
‘Zere Sûkede mal weyekerdene nêbena’
Memed Talay, zereyê suke de weyekerdena malî û fîyatê alifê malî ser gazincanê xo keno û wina vano: “Dewe de serbestîye bî, çutur ke vazena hînî karê xo kerdêne. Zelal û delalîye bî. Malê dewijan perûne bî, ver û viradeyî, koye, şîntorî çin bî, çutur ke vazena hînî raya xo de şîyêne. Zerê Sûke de towa çîno. Ma ûzade, hegayî ramitêne, bostanî ramitêne, hegayî çînitêne, cuwen çarnêne. Hengajî ra çîte ramitêne ewe gayî ra. Nika pêrûne caverda, hîn şî. Nika kes bese nêkeno şêro dewa xo. Dewe de bonî nêmendê, dar û ber nêmendo, teyr nêmendo. Raye çîna, olax çîn o. Nika kamose cew bîyo hezar, simer bîyo des hazarî. Vasê ma çîno, sîmer cême, alif herînenîme, çutur weye bikeme. Vame heqo ma bixelesne na heşîrîye wedarîyo. Tenê rojanê rindan bivênime. Ma verê destûnê kesî meke.”
