Sîyasetmedaro Kurd Mahmût Alinak, eşkera kerd ke do vera dorpêçê serê Kobanî dest bi çalakîya grevê vêşanî bikero.
Dorpêçê Hukmatê Demkî yê Sûrîya, çeteyê DAIŞ û çeteyê girêdayê dewleta Tirkîya serê şaristanê Kobanî roja 35î de dewam keno. Sîyasetmedaro Kurd Mahmût Alinakî eşkera kerd ke seba wedaritişê dorpêçî do dest bi çalakîya grevê vêşanî bikero. Mahmût Alinak vernîya buroyê avûkatîde yê merkezê şaristanê Qersî de eşkerayî da û wina vat: “Dorpêço wehşîyane yê serê Kobanî dewam keno. Ez zî seba vengê şarê kobanî yê dorpêçkerdî rê bibî vengêk siba dest bi grevê vêşanî kena.”
‘Colanî bi paştîdayena mîyanneteweyî ro kurdan zulim keno’
Alinak ard ziwan ke Colanî bi hetkarîya hêzanê mîyanneteweyî zulim ro şarê kurdî keno û wina vat: “Kobanî de gedeyî vêşanê û serde de yê. Dayîkî, heta şan serê beroşanê vengan de vindenê. Şarê Kobanî verê çimanê dinya de vistê hepisxaneyêk serakerde û merdimî ameya binpaykerdene. Merdimîye bêvenga, dewletî korê. Colanî paştî dewletan ra gêno û zulim ro şarê kurdî keno. Ez mîyanê bêçareyêka girdî de ya. Wexto ke şarê Kobanî serd ra recefêno, ez nêeşkena keyeyê xo yê germinî de ronişî. Her qetêk nanî ke ez wena qirika mi de maneno. Bêvengîya vera na neheqîye, zereyê mi dejeno. No semed ra zî seba hîskerdişê dejê şarî û seba vengê înan rê bibî vengêk, dest bi grevê vêşanî kena. Ê yê ke seba Kobanî wijdanê înan dejeno, wa veng bidê nê vengî.”
