Hemwelatîyê Bergarê yê Binarê Çîyayê Gareyî badê hîrê serran bi zorî zî bibo kewtî dewanê xo û bendê ke ameybî viraştene, hewanayî. Rewşa dewe dîmenê Gazze ana vîrê merdimî.
Hemwelatîyê dewa Mîjê û dewanê dormeyî badê serranê dergan vîyartî dewanê xo. Dewijan dî ke dewa înan hema-hema pêro ameya xirabkerdene. Mîyanê dewe de tena camî û tayê awanîyê bineerdî payra mendibî, ê bînî heme rijiyayî.
Bi foto û vîdeoyanê ke dewe ra ameybî girewtene, sewîyeya wehşetî û xirabkerdişo ke dewe de ameyo kerdene, ano çiman ver. Welatîyan vatbî ke çîyo ke Bergarê de ameyo kerdene, tena hêrişêko leşkerî nîyo, eynî wext de çinkerdişê cuye û ekosîstemê herêm o. Nê hêrişî bîbî sebebê binkewtişê komelkî û koçberdişê bi seyan keyeyanê herême.
Welatîyan heto bîn ra fikrê xo yê nerazîbîyayîşî yê hemverê nê wahşetî îfade kerdbî ke komelê neteweyî vera ci bêveng ê. Na herême rîyê pozîsyonê xo yê stratejîkî ra her wext binê tehdîdê hêrişan û bombardûmananê artêşa Tirkîya de bîye.
Ganî bêro vîrardene ke rîyê hêrişanê îşxalkerî yê dewleta tirke ra na herême ser o 20 ra zafêr dewî ameyê vengkerdene.
