Enqere – Cansu Çetîn ku ji Semsûrê ye, ji dema Osmaniyan ve bi malbatî koçî Kirşehîrê kirine. Niha jî li Enqereyê dijî. Pişt re hînî Kurdî dibe û niha dixwaze bibe mamosteya zimanê Kurdî.
Ji ber polîtîkayên mişextkirinê yên Dewleta Osmaniyan di salên 1690an de li bajarên bakurê Kurdistanê bi hezaran Kurd koçberî bajarên Tirkiyeyê yên weke, Enqere, Kirşehîr û Konyayê hatin kirin. Kurdên li Anatoliyaya Navîn tevî xerîbiyê jî ziman û çanda xwe parastin. Hinek jî ji wan rastî polîtikayên bişavtinê hatin û ji ziman û çanda xwe dûr ketin. Cansû Çetîn ji malbateke ji Semsûrê ye û malbat jî 400 sal berê li Semsûrê koçberî Kirşehîrê bûye. Cansû Çetîn ku niha li Enqereyê dijî ji polîtikayên bişavtinê bandor bûye û di zaroktiya xwe de qet bi Kurdî neaxiviye. Cansû Çetîn ku piştî mezin bûye vêgeriyaye li ser zimanê xwe û li Komeleya Çand û Ziman a Ankayê (ANKA-DER) ku li Enqereyê kar û xebatên ziman û çandê dimeşîne perwerdehiya Kurdî girtiye û fêrî Kurdî bûye. Cansû Çetîn ku niha di asta 2yemîn de dixwînê, dixwaze ku rojekê bibe mamosteya Zimanê Kurdî û Kurdî fêr bike.
‘Min nezanîna Kurdî kêmasî didît’
Cansû Çetîn diyar kir ku bavê wê Kurd e û diya wê Tirk e. Ji ber di malê de Kurdî nehatiyê axaftin wê qet Kurdî hîn nebûye. Cansû Çetîn anî ziman ku têkiliya wê ya Kurdî di zanîngehê de dest pê kiriye û wiha got: “Em li Semsûrê koçberî Kirşehîrê bûn e û niha li Enqerê dijîm. Min qet bi Kurdî nedizanî. Di zanîngehê de hevalên min ên Kurd hebûn û bi Kurdî diaxivîn bala min jî kişand. Ez jî Kurd bûm û min dizanî ez Kurd im. Min nezanîna ziman weke kemasî dît û xwest hînî Kurdî bibim. 4 sal in hewl didim Kurdî hîn bibim. Min pirtûk xwendin û çûm komeleyên ziman. Li ANKA-DERê hînî Kurdî bûm û niha li vir asta 2yemîn dixwînim.”
Cansû Çetîn bi lêv kir ku ew niha dixwaze bibe mamosteya Zimanê Kurdî û ev yek anîn ziman: “Zimanê me şêrîn e. Zimanê Kurdî xweş e. Zimanê me hebûna me ye. Divê hemû kes bi Kurdî biaxive. Ez pir dixwazim bibim mamosteya zimanê Kurdî. Niha ji bo wê hewl didim. Dixwazim Kurdî fêrî hemû kesan bikim. Ji ber ku zimanê me pir girîng e. Divê hemû Kurd bi Kurdî biaxivin. Ez wisa difikirim ku hemû Kurd dikarin zimanê xwe hîn bibin. Zimanê me gelek şêrîn e. Divê gelê me jî zimanê xwe hîn bibe. Komele hene, dikarin bi rêya wan komeleyan zimanê xwe hîn bibin. Yên ku bixwazin dikarin Kurdî hîn bibin.”
