Riha – Rojnameger Cîhan Bîlgîn ku li kuçeyên Amedê dest bi xebatên Çapemeniya Azad kir, her tim li ser şoreşa jinan û berxwedanê ya Bakur û Rojhilatê Sûriyeyê sekinî û bi nûçeyên xwe, pêvajoya ku weke “dîrokî” pênase dikir, ronî kir.
Dewleta tirk û koma wê ya paramîlîter SMO êrişên xwe yên li ser Bakur û Rojhilatê Sûriyeyê didomînin. Di encama hedefgirtina dewleta tirk de kedkarên Çapemeniya Azad rojnameger Nazim Daştan û Cîhan Bîlgîn ku geşedanên li Sûriyeyê dişopandin, li ser rêya di navbera Bendava Tişrînê û bajaroka Sirrînê de bi SÎHA’yan hatin qetilkirin. Nûçegihanên Ajansa Mezopotamyayê (MA) Ahmet Kanbal û Emrûllah Acar bi nûçeya amade kirin, qala rojnamevaniya Cîhan Bîlgînê ya di nava Çapemeniya Azad de kirin.
Li gorî nûçeya MAyê rojnameger Cîhan Bîlgîn di 27’ê Cotmeha sala 1995’an de li navçeya Midyadê ya Mêrdînê ji dayik bû. Piştî perwerdeyê, di sala 2014an de Çapemeniya Azad nas kir. Weke generala biçûk a Apê Mûsa, li kolanên Amedê dest bi xebatan kir. Cîhan Bîlgîn, belavkariya rojnameyên Azadiya Welat û Ozgur Gundemê kir. Di sala 2014an di dema êrişa DAIŞ’ê ya li ser Kobanê de beşdarî çalakiya nobetê ya li navçeya Pirsûsê ya Rihayê bû. Xeyala wê ya herî mezin jî ew bû ku “Şoreşa Jinê” ya piştî rizgarkirina Kobanê bibîne û şahidiya wê bike. Li ser vê yekê, di sala 2016an de di meha Kanûnê de berê xwe da Bakur û Rojhilatê Sûriyeyê û li Ajansa Nûçeyan a Hawarê (ANHA) xebatên xwe yên Çapemeniya Azad domand.
Kêlî bi kêlî rastî ji cîhanê re ragihand
Cîhan Bîlgîn, yek ji xwendekarên kedkarê Çapemeniya Azad rojnameger-nivîskar Seyît Evran (Seyît Mahmût Evran) bû. Cîhan Bîlgîn, bi çêkirina her nûçeya xwe bi raya giştî re “heqîqet” parve kir. Ji Qamişloyê heta Hesekê, ji Hesekê heta Şehba û Minbicê, her tim berê kameraya xwe da berxwedêran. Di dema êrişa DAIŞê ya di 20’ê Çileya 2022’yê ya li dijî Girtîgeha Sina ya Hesekê de jî tevî hevalê xwe yê rojnameger Nazim Daştan kêlî bi kêlî rastî ragihand û bû yek ji wan rojnamegeran ku rastiya li wir bi cîhanê re ragihand bû. Cîhan Bîlgîn yek ji wan rojnamegeran bû ku tev li kampanyaya li dijî “êrişên dagirkeriyê” yên li ser Herêma Kurdistana Federe hatibû destpêkirin bû. Cîhan Bîlgîn, ne tenê bi nûçeyên xwe, di heman demê de bi hestiyariya xwe ya li hemberî bûyerên civakî jî her tim ji hevalên xwe re bû mînak.
Berê kameraya xwe da têkoşîna jiyanê ya jinan
Rojnameger Cîhan Bîlgîn ku berê kameraya xwe da têkoşîna jiyanê ya jinan, çîrokên jinên hatin qetilkirin, binpêkirinên mafan û jinên li dijî dagirkeriyê li ber xwe didin, heta kêliya dawiyê jî berxwedana li Minbicê vegot ku rastî êrişa dewleta tirk û koma wê ya paramîlîter SMOyê hatibû. Piştî biryara derketina ji bajar a Meclisa Leşkerî ya Minbicê, îcar jî ji bo geşedanên li Tişrînê û Qereqozaqê ragihîne, tevî rojnameger Nazim Daştan berê xwe da herêmê. Dema ji Qereqozaqê ber bi Sirrînê ve diçû, li nêzî bajarokê Sirrînê tevî “agirbesta” di navbera dewleta tirk û HSDê de jî bi SÎHAyên dewleta tirk tevî Nazim Daştan hate qetilkirin.
Nûçeya Cîhan Bîlgîn a dawî ku di ANHAyê de hate weşandin, bi yek ji fermandarên eniya Qereqozaqê Roj Engîzek re hevpeyvîn kiribû. Di nûçeya xwe de berxwedana jinan raxistibû ber çavan.
Ji Ajansa Mezopotamyayê re axivî bû
Cîhan Bîlgîn, beriya were qetilkirin têkildarî geşedanên li herêmê ji Ajansa Mezopotamyayê (MA) re axivî bû. Di nirxandinên xwe de bal kişandibû ser armanca dewleta tirk û koma paramîlîter a ji Turbeya Silêman Şah û wiha gotibû: “Gelên herêmê di encama berxwedaneke mezin de tarîtiya DAIŞê têk bir. Lê belê niha jî dewleta tirk dixwaze heman tarîtiyê bîne ser vê xakê. Divê gelên cîhanê mîna li dijî DAIŞ’ê, niha jî li dijî êrişan dengê xwe derxîne. Pêdiviyeke jiyanî ye ku di avakirina Sûriyeya nû de statûya modêla Rêveberiya Xweser were naskirin.”
Cîhan Bîlgîn, demekî kin beriya were qetilkirin, ji hempîşeyekî xwe re peyama dawî şandibû û wiha gotibû: “Pêvajoyeke dîrokî li benda me ye.” Bi vê peyama xwe bal kişandibû ser girîngiya geşedanên dîrokî yên li Bakur û Rojhilatê Sûriyeyê.
Cîhan Bîlgîn a li ANHAyê dixebitî, di nava 8 salan de gelek nûçe amade kir. Çendek nûçeyên di demên dawî de çêkirî û deng vedayin wiha ne:
“*https://hawarnews.com/kr/fermandara-eniya-qereqozaq-em-rihe-kobane-ser-dikin
* https://hawarnews.com/kr/pergala-edalete-ya-jinan-a-sorese
* https://hawarnews.com/kr/li-ser-sopa-zenubiyaye-kombuneke-jinan
*https://hawarnews.com/kr/li-hember-tundiye-mertalek-mala-jin
* https://hawarnews.com/kr/ji-fermandare-qsde-nirxandin-u-peyamen-giring
https://hawarnews.com/kr/bi-sedan-nexwes-ji-xizmeta-tenduristiye-bepar-histin”
