Nuştox Denîz Gunduz fûarê kitaban ê Amedî de seba eleqeyê kitaban û ziwanî ser qesî kerd. Gunduzî va ke: “Rewşa zonê ma rind nîya, ma xo mexapnim, wayîr vecîme.”
Koordînatorê weşanxaneyê Vateyî Nuştox Denîz Gunduz fûarê kitaban ê Amedî de seba eleqeyê kitaban û ziwanî ser qesî kerd û va sebebê xo çîyo ez rind nêzana hema fûarê emserî de eleqa wendekaran zê seranê bînan nîya. gunduzî niya va: “Par zî ma ameyîme îta fuarê Amedi. Par eleqa zaf bî zê emserî. Emser tayê bîyo sist, zaf elaqa çinîyo. Ma zî ayere gerecî me.
Rind nêzana sebebê xo çiko. Par zaf eleqa bîye. Emser belki reklamê xo rind nîyamo kerdene. Rêna rewşa aborî zî rind nîya. Roj be roj halê miletî beno xirab belkî o zî tesîr keno. Zo bîna zî otobusî na hetî ser şenikê, şar bêro şêro. Gerê şaredarîye otobusan rono. Tayê durî kûno îta, gerê şaristanîye naye hesab bikero û gorê aye otobusan ayar bikero. Hêlo bîn ra şer esto belki hetê pîsîkolojî ra tesîr biko, ez henî fikirîna. Sebebê xo estê zafê.”
“Rewşa ziwanê ma rind nîya, ma xo mexapnim”
Gorê vênitena nuştox Denîz Gunduzî Fûarê kitaban de eleqêyê domanan û xortan ê serê ziwanê ma zaf şenika. Vano ke: “Xortî zaf şenîk ênê. Xortê ke ewro ameyî xo ra Hênî ra bî. Tayê mintiqayî, zê mintiqa Hênî, ma vacim belkî Pîran yanê cayanê nîyanênan de domanî hîna şenîk bo zî kirmanckî qesî kenê. Wexto ke ma qesîkerdena nî xortan vênenê kêfê ma êno. Mesela mintiqeyanê zê Dersimî zê Gimgimî yanê zafêrî zî cayo ke Elevî zêde tederê î cayîde to henî nêvênena ke domanê qicî an zî damanê des û panc serî ziwanê ma qesî bikê. Hama hama nêmendo yanê. Şenik mintiqeyande hîna domanî ziwanê ma qesî kenê. Rewşa ziwanê ma rind nîya, ma xo mexapnim.”
Dara ziwanê xo hişk mekime pira wayîr vecîme
Gunduzî seba ziwanê ma rê de bîn venga şarê ma da û va: “Ma timî seba nî ziwanî venga miletê ma danîme, reyna veng bidime. Yanê tayê sebebê xo elbette estê ama miletê ma gerê heşarê ziwanê xo bo. Yanê ziwanê xo ra wayîrîye bikero. Henî bifikirîyo, nika kalikan û bavikanê mara no ziwan marê mendo. Zo bîn marê çîyê nêmendo. No mendo, welatê ma mendo, kulturê ma mendo. Nika wexto ke ma wayîr mevecîme kirmanckî ra zazakî ra ma ke wayîr nêvecîyayîme jû kurmanc nêno wayîr nêvecîno. Jû Soran nêno wayîr nêvecîno, jû Tirk, jû Firansız, jû Yunan yan zî Rûs nêno wayîr nêvecîno. No bar barê ma no, ma gerê nî piştî bikime. Nî ra wayîr vecîme. Zo bîna zî tawa yê ma cînîyo. Ma vacime na dinya de jû dara ma esta a zî ziwanê ma a. Aye ra zî gerê na darê ma hişk mekime, ci ra wayîr vecîme.”
