Welatiyên bi navê Elî Guneş û Yaşar Aktert li ser peyamên Rêberê PKKê Abdullah Ocalan axivîn. Elî Guneş diyar kir ku di meseleya Kurd de piraniya partiyên siyasî û saziyên sivîl bêdeng dimînin û got: “Dema ku saziyên sivîl û partiyên siyasî bi rola xwe ranebin, dewlet jî gavên pêwîst navêje. Di destpêkê de pêwîst e nav li pêvajoyê bê kirin.”
Şandeya ji parlamenterên Partiya Wekhevî û Demokrasiyê ya Gelan (DEM Partî) Pervîn Buldan û Sirri Sureyya Onder pêk tê, di 28ê kanûna 2024an de çû li Girtîgeha Tîpa F ya Îmraliyê bi Rêberê PKKê Abdullah Ocalan re hevdîtin kir. Piştî vê hevdîtinê, şandeyê di 29ê Kanûnê de peyama ku ji 7 xalan pêk hat bi raya giştî re parve kir. Şandeyê, piştî hevdîtina li Îmraliyê li ser daxwaza Rêberê PKKê Abdullah Ocalan bi partiyên siyasî yên li Meclisê û siyasetmedarên girtî re hevdîtin kirin. Şandeyê piştî ku bi partiyên siyasî û siyasetmedaran re hevdîtin kirin di 22yê Çileyê de cara duyemîn çû Girava Îmraliyê û encamên hevdîtinên xwe bi Rêberê PKKê Abdullah Ocalan re parvekirin.
Şandeya Îmraliyê ya DEM Partiyê anî ziman ku Abdullah Ocalan careke din bi lêv kiriye ku ew ê di bin her şert û mercî de bibe xwedî hêz û vîna çareseriyê. Şandeya Îmraliyê dibêje, “Çareserî û aştiyeke tenê bi Tirkiyeyê re sînordar nayê nîqaşkirin û ji bo Kurd û gelên li çar aliyên Kurdistanê bigihîjin statuyeke demokratîk bi perspektîfeke berfireh nîqaş tên meşandin.”
Welatiyê bi navê Elî Guneş û Yaşar Aktert ên ji navçeya Pîrana Amedê têkildarî pêvajoya nîqaşa tê birêvebirin ji Ajansa Welat re axivîn.
‘Pêwîst e saziyên sivîl û partiyên siyasî erkên xwe bi cih bînin’
Elî Guneş anî ziman ku pêvajo bi awayekî zelal nayê meşandin û got: “Heke her tişt zelal be bila daxwazên me bên qebûlkirin. Ev pêvajoya ku serok Abdullah Ocalan daye destpêkirin em pir girîng dibînin. Ji xwe daxwaziya me jî yekitiya gelan e. Em dixwazin di destpêkê de nav li vê pêvajoyê bê kirin û pêvajo bi awayekî zelal bê meşandin. Di encama vê pêvajoyê de gelê Kurd dê çi bidest bixe pêwîst e zelal be.
Baweriya min bi dewletê nayê, ji aliyekî dibêjin me pêvajoyeke nû daye destpêkirin ji aliyê din ve qeyûman tayînî ser şaredariyên me dikin, îradeya gelê kurd xesp dikin. Ez vê tiştê rast nabînim. Di meseleya Kurd de piraniya partiyên siyasî û saziyên sivîl jî bêdeng dimînin. Dema ku saziyên sivîl û partiyên siyasî jî bi rola xwe ranebin, dewlet jî gavên pêwîst navêje. Ez dibêjim hewce ye ev sazî û partî bêtir berpirsyariyên xwe pêk bînin.
Ez dibêjim Tirk xwedî çi heq û hiqûqê ne gere Kurd jî xwedî heman heq û hiqûqan bin. Bi vî awayî em dibêjin pêwîst e êdî aşitiyeke baş pêk were.”
‘Dewlet bi kirinên xwe dîyar dike ku aştîyê naxwaze’
Yaşar Aktert jî destnîşan kir ku pêvajoyêk heye lê ji bo ku ev pêvajo bigihîje encamekî pêwîst divê pratîka dewletê biguhere û wiha axivî: “Dewlet bi van kirinên xwe aştiyê li holê nahêle. Her roj qeyûman tayînî şaredariyên me dikin, bi ÎHA û SÎHAyan êrişî Rojavayê Kurdistanê dike. Dewlet bi van kirinên xwe diyar dike ku aştiyê naxwaze. Em dixwazin bi zimanê xwe, bi çanda xwe bijîn lê di van mijaran de jî gavek nayê avêtin. Ji ber wê em nikarin bawerîya xwe ji vê pêvajoyê bînin. Em dixwazin lê yên li hemberî me naxwazin. Tirk jî CHP jî naxwazin. Dema ku bûyerek li dijî Kurdan diqewime ew jî bêdeng dimînin û wekî dewletê tevdigerin. Em ji zû ve amade ne, em dixwazin aştî pêk bê. Em li benda peyamên Rêberê Gelê Kurd bûn. Wî gotinên xwe gotin lê hêzên li hember hê jî tiştek negotine. Gotina me diyar e. Em dibêjin em bi hev re bijîn û em yekitiya gelan dixwazin.”
